भांगरभूंय | प्रतिनिधी
नवी दिल्ली, खबरां संस्था: एके अर्थीक सल्लागार अंपनीन केल्ल्या सर्वेक्षणांत अशें दिसून आयलें, 4.2 टक्के दादल्यांनी घटस्फोटा कडेन संबंदीत खर्च भागोवपा खातीर लग्ना उपरांत रीण घेतलां, जाल्यार 4.6 टक्के बायलांनी तांचें पगाराचें काम सोडलें वा उणें केलां.
’वन फायनान्स ऍडव्हायझरी कंपनी’ वरवीं टियर-1 आनी टियर-2 शारांतल्या 1,258 घटस्फोटीत वा घटस्फोटीत अर्जदारांचेर हें सर्वेक्षण केलें.
सर्वेक्षणांत अशेंे दिसून आयलें, 29 टक्के दादल्यांक पोटगी दिले उपरांत तांची वट्ट संपत्ती नकारात्मक आशिल्ल्याचें दिसलें. सर्वेक्षणा प्रमाण, दादल्यांच्या वर्सुकी उत्पन्नांत पोटगीचो वाटो 38% आशिल्लो.
घटस्फोटा कडेन संबंदीत खर्चाचेर 19% बायलांनी 5 लाखां परस चड खर्च केलो, जाल्यार 4.9% दादल्यांनी तितलीच रक्कम खर्च केली.
67% लोकांनी पयशां विशीं वाद घातिल्ल्याचेंे सर्वेक्षणांत मान्य केलें. 67 टक्के प्रतिसादकारांनी कबूल केलें, तांच्या लग्ना मजगतीं ते सदांच पयशांवेल्यान वाद घालताले. 4.3 टक्के लोकांनी अर्थीक वाद वा असमानताय हें तांच्या घटस्फोटाचें सरळ कारण आशिल्ल्याचें सांगलें. लग्नाच्या वेळार, 56 टक्के बायलां तांच्या घोवां परस उणें जोडटालीं. फकत 2% बायलांनी तांच्या घोवां परस चड जोडलें.
एक कारण : पयशांतलो फरक
वन फायनान्साचे सहसंस्थापक आनी सीईओ केवल भानुशाली हांणी लग्न जाल्ल्या दादले आनी बायलां मदीं अर्थीक विसंगती घटस्फोटाचें मुखेल कारण अशें सांगलें. वेगळेपणाच्या खर्चाक लागून ताण वाडटा आनी अस्थिरताय निर्माण जाता. देखून अर्थीक तयारी जितली म्हत्वाची तितलीच भावनीक तयारी म्हत्वाची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
