भांगरभूंय | प्रतिनिधी
नवी दिल्ली, खबरां संस्था: दिल्ली उच्च न्यायालयान घटस्फोट आनी पोटगी प्रकरणांत एक म्हत्वाचो निकाल दिला. ह्या निकालांत न्यायालयान म्हणलां, अर्थीक नदरेन स्वातंत्र्य आनी जोडपाक सक्षम आशिल्लो जोडीदार पोटगी खातीर पात्र ना. न्यायालयान पोटगी ही समाजीक न्यायाची कायमस्वरूपी उपाय येवजण आशिल्ल्याचें नमूद केलें. तशेंच पोटगी अर्थीक समानताय वा फायदो मेळोवपाचे साधन आसपाक शकना, अशेंय तांणी म्हणलें.
दिल्ली उच्च न्यायालयान ह्या घटस्फोटाच्या खटल्याच्या सुनावणे वेळार, हिंदू लग्न कायद्याच्या कलम 25 खाला पोटगी फकत तेन्नाच दिवपाक शकता जेन्ना याचिका करप्याक खरेंच अर्थीक मजतीची गरज आशिल्ल्याचें सिद्ध जाता. स्वावलंबी जोडीदाराक पोटगी दिवप हें न्यायालयीन विवेकबुद्धीचो अयोग्य वापर थारतलो.
ह्या प्रकरणांत दिल्ली उच्च न्यायालयान बायलेक पोटगी न्हयकारपाचो आनी क्रुरतेच्या आदारार तिच्या घोवाक घटस्फोट मंजूर करपाचो कुटुंबीक न्यायालयाचो निर्णय कायम दवरलो. ह्या प्रकरणांतल्या जोडप्यान जानेवारी 2010 वर्सा लग्न केल्लें, मात तें 14 म्हयन्यांनीच वेगळें जाल्लें.
ह्या प्रकरणांत घोव वेवसायान वकील आनी बायल भारतीय रेल्वे येरादारी सेवेंत गट-अ दर्जाची अधिकारी आसा. घोवान आपले बायलेचेर मानसीक आनी शरिरीक क्रुरताय, वायट शब्द वापरप आनी बदनामी केल्ल्याचो आरोप केल्लो. जाल्यार बायलेनूय घोवाचेर छळ केल्ल्याचो आरोप केल्लो.
उपरांत कुटुंबीक न्यायालयान ह्या जोडप्याचो घटस्फोट मंजूर केल्लो. ह्या वेळार बायलेन 50 लाखांची मागणी केल्ली. दिल्ली, उच्च न्यायालयान म्हणलें, हे वृत्तीवेल्यान अशें दिसून येता, ह्या प्रकरणांतलो हेतू लग्न वाटावप न्हय, अर्थीक फायदो मेळोवप आशिल्लो.
घोव- बायल एकठांय राविल्ल्याचो काळ, भुरगें नासप आनी बायलेचे चड उत्पन्न, ह्यो सगल्यो गजाली लक्षांत घेवन तिका पोटगी दिवपाक मेळची ना, अशें नमूद करीत दिल्ली उच्च न्यायालयान कुटुंबीक न्यायालयाचो आदेश कायम दवरलो आनी पोटगीचो दावो भायर मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
