घटस्फोटाचें वाडटें प्रमाण हुस्क्याचें

भांगरभूंय | प्रतिनिधी

बायलेक साडी न्हेसूंक येना, बायलेक सारकें जेवण करूंक कळना. बायल सेगीत टीव्ही आनी मोबायलार आसता. बायल आपलो मान राखना ह्या सारकीं हांसपाक येवपी आनी मनाक न पटपी कारणां दिवन घटस्फोट मागतात.

लग्नाच्यो गांठी सर्गांतूच बांदतात अशें म्हणटात. पयलीं ह्यो गांठी घट्ट बांदताले. कारण ह्यो गांठी जिणभर तुटनाशिल्ल्यो. इतलेंच न्हय जाल्यार होच सांगाती फुडल्या सात जल्मांत मेळूं अशी प्रार्थना घोव-बायलां देवा कडेन करतालीं. हालीं मात ह्यो लग्नाच्यो गांठी सदळ बी बांदतात? असो एक दुबाव येवंक लागला. कारण आयुश्यभर सोडाच पूण कांय वर्सां लेगीत लग्न जाल्लें जोडपें एकठांय रावपाक तयार ना. लग्नाच्या कांय वर्सां उपरांत घोव-बायले मदीं वाद जाता आनी हो वाद सरळ घटस्फोटा मेरेन पावता. आयज देशांतल्या न्यायालयांनी घटस्फोटाच्यो लाखांनी याचिका प्रलंबीत आसात. दीसपट्ट्यो तातूंत भर पडत आसात. घटस्फोटाची नवी याचिका दाखल जाली ना असो एकूय दीस उजवाडलो ना.
घटस्फोटाचें लाखांनी खटले प्रलंबीत आशिल्ल्यान स म्हयन्यां भितर घटस्फोटाचो निकाल दिवचो असो निर्णय न्यायालयान घेतला. घटस्फोटाचे खटले ताकतिकेन निकालांत काडटात आसले तरी तातूंत नव्यान भर पडत आशिल्ल्यान न्यायालयां लेगीत हतबल जाल्यांत. तशें पळोवंक गेल्यार दोन दसकां पयलीं घटस्फोटाचें प्रमाण उण्या प्रमाणांत आशिल्लें. निमाणो पर्याय म्हूण घटस्फोटा कडेन पळयताले. आयज मात सामक्या साद्या कारणाक लागून लेगीत घटस्फोट मागतात. आयज न्यायालयांनी दाखल जावपी घटस्फोटाचीं कारणां पळयत जाल्यार घुंवळ येवन पडटले. बायलेक साडी न्हेसूंक येना, बायलेक सारकें जेवण करूंक कळना. बायल सेगीत टीव्ही आनी मोबायलार आसता. बायल आपलो मान राखना ह्या सारकीं हांसपाक येवपी आनी मनाक न पटपी कारणां दिवन घटस्फोट मागतात.
बायले कडल्यानूय घटस्फोटाचीं अशींच कसलीं तरी कारणां दितात. घोव आपल्याक वेळ दिना. घोव फक्त आवय-बापायचेंच आयकता. घोव आपल्याक भायर भोंवपाक व्हरना. घोव आपल्या मना सारको वागना अशीं हांसपाक येवपी कारणां दिवन घटस्फोटाचीं मागणी करतात. घटस्फोटाची ही किरकोळ कारणां जितलीं हांसपाची कशीं दिसतात तितलींच ती हुस्को करपा सारकीं लेगीत आसात. कारण अशा किरकोळ कारणांनी जर घटस्फोट जावंक लागले जाल्यार विवाह संस्थांच घाताक येतली. तशेंच घोव मारपेट करता, अनैसर्गीक संबंदाची मागणी करता, बायल उरफाटी उलयता. घोवाक मान दिना अशीं कारणां दिवन लेगीत घटस्फोटाची मागणी करतात. अशीं आनी हाचे परसूय खूबशीं वेगळींवेगळीं कारणां घटस्फोटा खातीर दितात. अर्थांत सगल्या कारणांचो अभ्यास करुनच न्यायालय घटस्फोटाचो निकाल दिता.
अर्थांत अश्या किरकोळ कारणां खातीर घटस्फोटाची मागणी करप कितले मेरेन योग्य आसा हाचो विचार दोगांनीय करूंक जाय. नातें कसलेंय आसूं तातूंत राग, रुसप आसताच. संवसार म्हणलो की आयदनाक आयदन लागताच. जर दोगांय मदीं वाद जालो जाल्यार दोगां मदल्या एकल्यान शांत रावचें. थोड्या वेळान राग शांत जाता आनी वादूय मिटून वता. पूण उतराक उतर लागत जाल्यार वाद वाडत वता आनी वादाचें रुपांतर व्हड झगड्यांत जाता. तातूंत दोनूय कडल्या नात्यां मदलो कोण ना कोण तरी तेल रकोवपाचें काम करता. अशे तेल रकोवपी येत जाल्यार हो वाद सरळ न्यायालयांत पावता. सामकें शुल्लक कारण लेगीत नातें तुटपाक फावोशें थारत आशिल्ल्यान नात्याची गुंफण घालतना मात्शें सांबाळूनच वागचें पडटा. म्हजें चुकलेंच हें मनान मान्य करचें पडटा, जाल्यार नातें तिगून उरता आनी तातूंतय गोडसाण उरता.
नात्या मदीं सगल्यांत म्हत्वाचो आसता तो विस्वास. जर विस्वासाक वेर वचत जाल्यार नात्यांत वितुश्टताय येताच. म्हणून घोव-बायल हांचे मदीं विस्वास खूब म्हत्वाचो आसा. विस्वासक वेर वचूंक दिवची न्हय ही जापसालदारकी दोगांयची आसता. नात्यांत दुरावो जावपाचें आनीक एक म्हत्वाचें कारण म्हणल्यार घोव-बायल हांचें मदीं आशिल्लो अहंकार. अहंकाराक लागूनच नातीं तुट्टात. म्हणूनच दोगांनीय अहंकार पयस दवरूंक जाय. अहंकाराक पयस दवरून दोगांय मदलो विस्वास कायम दवरीत जाल्यार नात्यां मदीं दुरोवो निर्माण जावचो ना आनी घटस्फोटाचें प्रमाणूय उणें जातलें.
बाल विवाह समस्या पयस जावची
बाल विवाहाक कायदेशीर बंदी आसून लेगीत आयज बाल विवाह व्हड प्रमाणांत जायत आसात. दर दिसा खबरांपत्रांनी ह्या विशयाचेर एखादी तरी खबर आसताच. लॉकडावनांत ह्या बाल विवाहाचें प्रमाण खूब वाडिल्लें. आतां सगलें सुरळीत सुरू जाले उपरांत तरी बाल विवाहाचें प्रमाण उणें जातलें अशें दिसतालें. पूण अजून लेगीत देशांत अशे तरेचे बाल विवाह जायत आसात. हाचेर आतां संयुक्त राष्ट्र संघानूय म्होर मारल्या. सस्टेनेबल डेव्हलमपेंट गोल्स रिपोर्ट 2024 ह्या नांवान संयुक्त राष्ट्र संघान एक अहवाल हालींच जाहीर केला. ह्या अहवाला प्रमाण भारतांत आयज मेरेन वीस कोटी चलयांचे बाल विवाह जाल्यात. ह्याच अहवालांत अशेंय म्हळां की भारतांत पांच चलयां मदल्या एका चलयेचें लग्न अठरा वर्सा पिराये पयलींच जाता. संवसारांत जावपी बाल विवाहा मदीं एक तृतियांश बाल विवाह भारतांत जातात. ही आंकडेवारी हुस्को करपा सारकी आसा.
ह्याच अहवालांत आमच्या देशांत बाल विवाह आडावपा खातीर प्रशासकी पांवड्यार जावपी यत्नांची लेगीत तोखणाय केल्या. बाल विवाह आडावपा खातीर प्रशासकी पांवड्यार यत्न जायत आसले तरी दरेक फावटी प्रशासनाक अशे तरेचे बाल विवाह आडावपाक येस येताच अशें ना. खूबशे फावटी प्रशासनाचे नदरे आड बाल विवाह जातात.
आमच्या देशांत चलो, चली हांच्या लग्नाची पिराय कायद्यान थारावन दिल्या. चल्याच्या लग्नाची पिराय 21 जाल्यार चलयेच्या लग्नाची पिराय 18 आसची असो कायदो सांगता. ताचे परस उणे पिरायेंत लग्न जायत जाल्यार तो बाल विवाह अशें समजतात. 2006 वर्सा केंद्र सरकारान बाल विवाह प्रतिबंधक कायदो नव्यान मंजूर केला. पूण सरकारान मंजूर केल्ल्या कायद्या प्रमाण बाल विवाहाक खर ख्यास्तीची तरतूद आसा. पूण ह्या कायद्याची योग्य तरेन अंमलबजावणी जायत नाशिल्ल्यान ह्या कायद्याचो धाक उरिल्लो ना. बाल विवाह जाल्ल्या चलो, चलयेक भुरगेपणांतूच संवसाराचो गाडो चलोवचो पडटा. ताका लागून तांचे भुरगेपण शेणून वता. शिक्षण अर्दकुटें उरता. बाल विवाह जाल्ल्या चलयांक ल्हान पिरायेंतूच आवयपण येता. ताका लागून जल्माक येवपी भुरगें लेगीत सशक्त नासता. बाल पिरायेंतूच आवय जाल्ल्या चलयांक लेगीत भलायकेच्यो समस्या निर्माण जातात. ताका लागून कुपोशणा सयत खूबश्या दुयेंसांक सामकार वच्चें पडटा.
आयज आमचो देश सगल्या मळार उदरगत करीत आसा. इंटरनॅट, मोबायल, आधुनीक तंत्रज्ञान हाका लागून आमी संवसारा मुखार सर्त करीत आसात. आमी चंद्रार लेगीत पावले. संवसारांतल्या प्रगत देशां मदीं आमचें नांव जावंक लागलां. आधुनीक शिक्षण घेवन आमी काळा बरोबर मुखार वचत आसतना गांवगिऱ्या वाठारांतल्यो चलयो बाल विवाहाक बळी पडत आसात. ही विसंगती बदलूंक जाय. ते खातीर बाल विवाह समस्या मुळा सावन पयस जावची.

श्याम ठाणेदार
9922546295