घटमूट नात्याची परब

भांगरभूंय | प्रतिनिधी

श्रावणातली एक मुखेल परब म्हळ्यार रक्षाबंधन.  भावा भयणाच्या घट्ट अश्या नात्याची गवाय दिवपी परब म्हळ्यार रक्षाबंधन. भावा भयंणाच्या नात्याची, एकवटाची ही परब. हे परबेक आपलें वेगळें अशें खाशेलपण आसा. ही परब श्रावणाच्या पुनवे दिसा मनयतात. ही परब घटमुट नात्याची. राखणेची. 

ह्या दिसा भयण भावाक पाटार बसयता, ताका तिबो लायता, आरत ओवाळटा, दिश्ट काडटा  आनी मागीर भावाच्या मनगटाक राखी बांदता. उपरात गोडशें खांवयता. भाव भयणीक हाडिल्ली भेटवस्त तिका दिता. तशेंच जल्मभर आपलो भाव आपली राखण करतलो म्हूण भावा कडच्यान आशीर्वाद घेता. 

ही परब फकत गोंयापुरतीच मर्यादित ना तर पुराय भारतीया खातीर एक म्हत्वाची परब. ही रेशमी राखी म्हळ्यार भयणीन भावाच्या हातान बांदिल्ली राखण. एक पवित्र धागो, जो भावा- भयणीच्या अतूट नात्याक घट धरून रावता. भयण सदांच आपल्या भावाक खूप आयुष्य मेळचें म्हूण देवा लागीं मागणें मागता. आनी भाव तिका संरक्षणाचें वचन दिता. 

पयलींच्या काळार रक्षाबंधन शास्त्रा प्रमाण जातालें. आतां धांवपळीच्या काळांत आनी नवीन फॅशन युगात कांय भयणी राखी पोस्टान धाडून दितात आनी भेट ऑनलायन. अशे केल्ल्यान हें नातें एक ‘formality’ जायत चल्लां. कांय भाव, भयणांची खरेंच अडचण आसता. कांय जाण परदेशांत रावतात मागीर ती पोस्टांतल्यान आपली राखी धाडून दितात. हें नातें कशें राखप आनी ताचो सांबाळ करप हें आसता भावा- भयणीचेर.

रक्षाबंधना बद्दल खुपश्यो काणयो आसात. तांतली ही काणी महाभारतांतली. शिशुपाला वांगडा झूज चालू आसताना कृष्णान आपल्या सुदर्शनाचो वापर केलो तेन्ना ताच्या बोटाक दुखापत जाली आनी खूप रक्त व्हांवपाक लागलें, तेन्ना द्रौपदीन आपल्या साडयेचो कुडको पिंजलो आनी ताच्या बोटाक बांदलो. तेन्ना तिची आपुलकी पळोवन कृष्णान तिका आपली भयण मानली आनी आपूण तुजे सदांच संरक्षण करतलों अशें द्रौपदीक वचन दिलें. उपरात जेन्ना द्रौपदीच्या घोवांनी तिका पणाक लायली तेन्ना कौरवांनी द्रौपदीचें वस्त्रहरण करपाचो यत्न केलो. त्यावेळार कृष्णान हें वायट कृत्य घडपाक दिलेंना आनी आपले भयणीचो मान राखलो. ताणें आपलें भावाचें कर्तव्य सार्थ करून दाखयलें, अशी एक काणी आसा. ही परब दर ऐकल्यान मनोवची आनी आपलीं नातीं घट करचीं.

 शिल्पा लाड 

8411007204