भांगरभूंय | प्रतिनिधी
आयज 21 जून हो दीस संवसारभर आंतरराष्ट्रीय योग दीस म्हणून मनयतात. सप्टेंबर 2014 वर्सा जाल्ले संयुक्त राष्ट्रांच्या सार्वत्रिक सभेंत 21 जून हो आंतरराष्ट्रीय योग दीस म्हणून मनोवपाचो प्रस्ताव भारतीय प्रधानमंत्री नरेंद्र मोदी हांणी मांडलो. संवसारांतल्या जायत्या देशांनी हो सगळ्यांत व्हड दीस.
21 जून दिसा उत्तरायण सोंपता आनी दक्षिणायन सुरू जाता. ह्या दिसा दीस लांब आनी रात ल्हान आसता. 21 जून दिसा सुर्योदय बेगीन आनी सांजवेळार चड वेळ मेरेन उजवाड आसता. देखून ह्या दिसाक खाशेलें म्हत्व. म्हणून होच दीस आंतरराष्ट्रीय योग दीस म्हणून मनोवपाचो प्रस्ताव प्रधानमंत्री नरेंद्र मोदी हांणी मांडलो. तांच्या ह्या प्रस्तावाक संयुक्त राश्ट्रांच्या 193 देशांतल्या 175 देशांच्या प्रतिनिधींनी तेंको दिलो. सुरक्षा आयोगाचे कायमचे वांगडी आशिल्ले अमेरिकेंत, इंग्लंड, फ्रांस, चीन, रशिया सारकिल्ले देशूय ह्या प्रस्तावाचे सहप्रतिनिधी आसात. पयलो आंतरराष्ट्रीय योग दीस 21 जून 2015 दिसा संवसारभर मनयलो.
योग म्हळ्यार कूड आनी मन एकठांय करुन केल्लो व्यायाम. आयच्या व्यस्त जिवितांत आमी योगा वरवीं आमची कूड ठणठणीत दवरूंक शकतात, ते भायर मनाचेर बरें संस्कार करुंक शकता. भारतांतली योग संस्कृताय संवसारीक पांवड्यार मान्य जाल्या. संवसारभरांतल्या देशांनी फकत योग आपणायला अशें न्हय, तर ताचो प्रचार आनी प्रसारय केला. कोरोना महामारीच्या काळांत योग दिसाक खाशेलें म्हत्व मेळ्ळें. कोरोना सारकिल्ल्या महामारी आड झुजपाक जाय जाल्यार आमच्या कुडीची रोगप्रतिकार शक्त वाडोवपाचेर लक्ष केंद्रीत करपाक जाय.
योग कसो करचो, खंयच्या योगासनाक लागून मन आनी कूड घटमूट दवरूं येता हाचेर अभ्यासकांनी मता मांडल्या. अशे तरेन दर दिसा योग करप गरजेचें आसता. आयज योग दिसा निमतान एक दीस योग करून सोशल मिडियाचेर आपले फोटो घालून ती एक कार्यावळ करीनासतना नेमान योग करचो. आमी नेमान योग केल्यारच आयचो योग दीस फायद्याचो थारतलो, अशें म्हणू येता.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
