भांगरभूंय | प्रतिनिधी
-समान नागरी कायदो, एक देश एक वेंचणुकेची कार्यवाही जावपाक जाय पणजी : दर एकलो हक्कां विशीं जागरूक आसता. घटनेन हक्कां सयत कांय कर्तव्यां नागरिकांचेर घाल्यात. दर एकल्यान हक्कां सयत कर्तव्यांक पाळो दिलो जाल्यारूच घटनेची प्रभावी अंमलबजावणी जावप शक्य आसा. समान नागरी कायदो तशेंच एक देश, एक वेंचणुकेची कार्यवाही जावपाची गरज आसा, अशें मुख्यमंत्री डॉ. प्रमोद सावंत हांणी सांगलें.
गोंय विद्यापिठांत घटनेच्या 75 व्या वर्सा निमतान आयोजीत कार्यावळींत मुखेल सोयरे ह्या नात्यान मुख्यमंत्री उलयताले. कायदो मंत्री अालेक्स सिक्वेरा, विरोधी पक्ष फुडारी युरी आलेमांव, अॅडव्होकेट जनरल देविदास पांगम, मुखेल सचीव डॉ. व्ही. कांडावेलू, गोंय विद्यापिठाचे कुलगुरू प्रा. हरिलाल मेनन, निवृत्त न्यायाधीश सिद्धार्थ मृदुल कार्यावळीक हाजीर आशिल्ले.
समान नागरी कायदो सगल्यांत पयलीं गोंयांत लागू जालो. गोंयातल्या सर्वधर्म समभावाची सगळे जाण तोखणाय करतात. गोंय हे सगल्याच बाबतींत आदर्श राज्य आसा. भारत देश स्वतंत्र जालो तेन्ना पाकिस्तानाची निर्मिती जाली. कालांतरान बांगलादेशाची निर्मिती जाली. पाकिस्तान आनी बांगलादेशांत जशें अराजकतेचें वातावरण आसा तशें भारतांत ना. भारतांत घटने प्रमाण लोकशाय चलता. घटनेन जे हक्क आनी कर्तव्यां दिल्यात ताची जाणविकाय सगल्यांनी दवरपाक जाय. देशाच्या स्वातंत्र्याक 75 वर्सां जाले उपरांत लेगीत दादलो आनी बायल हांचे समानताये खातीर झगडचे पडटा. दादलो आनी बायल हांचें मदीं समानताय हाडपा खातीर प्रधानमंत्री नरेंद्र मोदी हांणी बायलां खातीर 33 टक्के राखीवतेचें विधेयक हाडलें. उदक, रस्ते, वीज ह्यो सुविधा कांय कडेन अजून पावूंक नात. घटनेक पाळो दिवन देशाच्या उदरगती खातीर डिजीटल इंडिया, स्टार्ट अप इंडिया, स्वच्छता अभियान मोहीम प्रधानमंत्र्यांनी राबयली. विकसीत भारताचें सपन पुराय जावपा खातीर दरेकी भारतीयाचें योगदान म्हत्वाचें आसा, अशें मुख्यमंत्री डॉ. प्रमोद सावंत हांणी सांंगलें.
ह्या वेळार मणीपूर उच्च न्यायालयाचे निवृत्त मुखेल न्यायाधीश सिद्धार्थ मृदुल हांचे मुखेल भाशण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
