भांगरभूंय | प्रतिनिधी
‘मेकर ऑफ मॉडर्न गोवा’ पुस्तिकेचे विमोचन
पणजी: कदंब म्हामंडळा सयत हेर प्रकल्प आनी उपक्रमांची बुन्याद घालून प्रतापसिंह राणे हांणी राज्याचे उदरगती खातीर मोलादीक वावर केला. तांकां लागून गोंयांक घटक राज्य, स्वतंत्र भास आनी स्वतंत्र वळख मेळ्ळी. सर्गेस्त भाऊसायब बांदोडकार, मनोहर पर्रीकार हांचे प्रमाण मुख्यमंत्री म्हूण ते सेगीत यादींत उरतलें, अशें मुख्यमंत्री डॉ. प्रमोद सावंत हांणी म्हणलें. आदले मुख्यमंत्री प्रतापसिंह राणे हांच्या जल्मदिसाच्या सुवाळ्यांत ते उलयताले.
आदले मुख्यमंत्री प्रतापसिंह राणे हांचो जल्मदीस आयतारा व्हडा दबाज्यान पर्ये मतदारसंघांत मनयलो. मुख्यमंत्री डॉ. प्रमोद सावंत, आदले केंद्रीय मंत्री सुरेश प्रभू, केंद्रीय मंत्री श्रीपाद नायक, खासदार सदानंद शेट तानावडे, विजयादेवी राणे, मंत्री विश्वजीत राणे, आमदार देविया राणे माचयेर आशिल्ली. मंत्री मॉवीन गुदिन्हो, अालेक्स सिक्वेरा, अॅड. रमाकांत खलप, आमदार आनी हेर मंत्र्यांची कार्यावळीक हजेरी आशिल्ली.
प्रतापसिंह राणे हांचे कडल्यान शिकपा सारके बरेच कितें आसा. सेगीत 50 वर्सा विधानसभेंत आसप हो विक्रम प्रतापसिंह राणे हांचे खेरीत हेर कोणाच्याच नांवार आसचो ना. मुख्यमंत्रीपदाचे कारकिर्दींत कदंबा म्हामंडळा सयत हेर बऱ्याच वावराची तांणी बुन्याद घाली. मुख्यमंत्री, सभापती जाले उपरांत ते विधानसभेंत आमदार आशिल्ले. तेन्ना लेगीत ते सेगीत सभाघरात उपस्थीत रावताले. सभापती म्हूण तांणी दिल्ले निर्णय हे आदर्श थारल्यात. आमदार आसतना मंत्री वा सभापतींच्यो चुको ते नदरेक हाडून दिताले, अशें मुख्यमंत्री डॉ. प्रमोद सावंत हांणी सांगलें.
अटलबिहारी वाजपेयी सरकारांत आपूण मंत्री आसतना प्रतापसिंह राणे मुख्यमंत्री आशिल्ले. तांणी तेन्ना लेगीत आपणाक तेंको दिल्लो, अशें सुरेश प्रभू हांणी सांगलें. सैमाची जतनाय करतनाच गोंयांत मुळाव्या सुविधांची उबारणी करपाक तांचें व्हड योगदान आसा, अशें तांणी सांगलें.
प्रतापसिंह राणे हे सोबीत आनी प्रगतीशील गोंयचे शिल्पकार आसात, अशें केंद्रीय मंत्री श्रीपाद नायक हांणी म्हणलें.
शिस्त, सोंशिकसाण आनी संयम हे गूण राणे हांचे कडल्यान घेवपा सारके आसात. गोंयां खातीर तांणी व्हड योगदान दिलां, अशें खासदार सदानंद शेट तानावडे हांणी सांगलें. भलायकी मंत्री विश्वजीत राणे हांणी येवकाराचे उलोवप केले. सिद्धी उपाध्ये हांणी सुत्रनिवेदन केले. प्रतापसिंग राणे हांच्या जिविताचे चित्रण करपी डॉक्युमेंटरी हे वेळार प्रदर्शीत केली.
‘मेकर ऑफ मॉर्डन गोवा’ पुस्तिकेचे विमोचन
विजयादेवी राणे हांणी बरयिल्ल्या ‘मेकर ऑफ मॉडर्न गोवा’ पुस्तिकेचे विमोचन जाले. विजयादेवी राणे हांणी हे चरित्र बरयलां. अॅड. यतीश नायक आनी हेरांनी आग्रो केल्ल्यान आपणें चरित्र बरयलां. हांव गोंयांत आयले तेन्ना रस्ते, उदक अशो सुविधा नाशिल्यो. सुविधा उबारपाक प्रतापसिंह राणे हांणी बरेच कश्ट घेतले, अशें ह्या वेळार विजयादेवी राणे हांणी सांगलें.
गोंयची उदरगत फुडेंं व्हरची: प्रतापसिंह राणे
लोकांनी आपणाक बरीच वर्सां गोंया खातीर वावर करपाची संद दिली. हांव सगल्या लोकांचो उपकारी आसा. राज्याची उदरगत अशीच फुडें वचपाक जाय, अशें प्रतापसिंह राणें हांणी सांगलें.
अभिनेत्री हेमा मालिनी, हर्षदप्रीत कौर हांची हाजेरी
जल्मदिसाच्या सुवाळ्याक अभिनेत्री हेमा मालिनी हांची खाशेली उपस्थिती आशिल्ली. तांकां माचयेर आपोवन तिचो भोवमान केलो. तशेंच जागतीक पांवड्या वयले गायक कलाकार हर्षदप्रीत कौर हांच्या गायनान सुरवातीक कार्यावळीक रंग आयलो. तांणी जायतीं पदां सादर करून उपस्थितांची मनरिझवण केली. तशेंच ह्या वेळार अभिनेत्री हेमा मालिनी हांणी शास्त्रीय नृत्य सादर केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
