भांगरभूंय | प्रतिनिधी
हडफडें, नागवा, पर्रा पीडीएंतल्यान वगळटले
भांगरभूंय I प्रतिनिधी
पणजी : ‘ग्रेटर पणजी पीडीए’ रद्द करपा सयत पीडीएंतल्यान हडफडें, नागवा, पर्रा भायर काडपाचो म्हत्वाचो निर्णय नगर नियोजन मंडळान घेतिल्ल्याची म्हायती मंडळाचे बसके उपरांत पत्रकारां कडेन उलयतना नगर नियोजन मंत्री विश्वजीत राणे हांणी दिली.
मंडळाचे वांगडी आमदार राजेश फळदेसाय, मुख्य नगर नियोजक राजेश नायक आनी हेर वरिश्ठ अधिकारी ह्या वेळार हाजीर आशिल्ले. हडफडें, नागवा, पर्रा ओडीपी विशीं जायते जाण न्यायालयांत गेल्यात. जायत्या जाणांनी हे विशीं आक्षेप नोंदयल्यात. ताका लागून हे भाग पीडीएच्या अधिकार क्षेत्रांतल्यान भायर काडपाचो निर्णय घेवन, ते खातीरच्यो सुचोवण्यो आनी हरकतीं खातीर 60 दिसांची मुजत दिल्या. लोकां कडल्यान सुचोवण्यो आनी हरकती आयले उपरांत रितसर हे भाग पीडीएंतल्यान वगळटले, अशें मंत्री विश्वजीत राणे हांणी म्हणलें.
हडफडें, नागवा, पर्रा वाग उत्तर गोंय पीडीएंतल्यान वगळपाचो निर्णय पीडीएचे अध्यक्ष आमदार जेनिफर मोंसेरात हांकां, जाल्यार ग्रेटर पणजी पीडीए रद्द करपाचो निर्णय पणजेचे आमदार तशेंच मंत्री आतानासियो (बाबूश) मोंसेरात हांकां विस्वासांत घेवनूच घेतला, अशें तांणी सांगलें.
मजगतीं, नगर नियोजन कायद्याच्या कलम 16 ‘ब’ खाला आयिल्ल्या 6 हजार अर्जांतल्यान 1,222 अर्जांक हंगामी, जाल्यार 253 अर्जांक निमाणी मंजुरी दिल्या, अशेंय तांणी स्पश्ट केले.
फिल्म सिटीच्या प्रस्तावा विशीं उलयतना, शंबर एकर परस चड क्षेत्र आसल्यार फिल्म सिटी विशीं विचार करतले. नगर नियोजन मंडळच हे विशीं निमाणो निर्णय घेतले, अशें मंत्री विश्वजीत राणे हांणी स्पश्ट केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
