भांगरभूंय | प्रतिनिधी
पणजी : ग्रॅण्ड हयातचे बांबोळे सर्वे नं. 12/1 आनी 99/2 त आशिल्लें बांदकाम हें सीआरझेड नेम मोडटा. ताका लागून ताचें काम बंद करपाचो आदेश गोंय दर्यादेग वेवस्थापन प्राधिकरणान (जीसीझॅडएमए) दिला. तशेंच हें बांदकाम मोडपा संबंदीची नोटीस लेगीत जारी केल्या.
हे विशींची सुनावणी 24 एप्रीलाक दनपारां 3.30 वरांचेर पाटो – पणजेच्या जीसीझॅडएमएच्या कार्यालयांत जातली. ह्या वेळार हॉटेलाच्या अधिकृत अधिकार्यान बांदकाम तशेंच जीसीझॅडएमएचे परवाने सादर करप गरजेचें आसा. बांबोळे ग्रॅण्ड हयाता कडेन सीआरझॅड कायदो मोडून बेकायदो बांदकाम सुरू आशिल्ल्याची कागाळ थळावे आमदार विरेश बोरकार, प्रा. रामराव वाघ तशेंच हेरांनी केल्ली. हे कागाळीची दखल घेवन गोंय दर्यादेग वेवस्थापन प्राधिकरणाच्या (जीसीझॅडएमए) अधिकार्यांनी बांधकामाची पळोवणी केली. 10 मिटर लांबायेचें आनी 3.2 मिटर उंचायेचें बांदकाम पुराय जालां. बुन्यादीचें बांदकामूय पुराय जालां. हो वाठार सीआरझॅड – 3 त येता. सीआरझॅड अधिसुचोवणी 2011 प्रमाण न्हंये पसून 100 मिटर आनी दर्या पसून 500 मिटर अंतरा मेरेन बांदकाम करपा खातीर जीसीझॅएमएची परवानगी घेवप गरजेचें आसा. हें बांदकाम सीआरझॅड नेम मोडपी आशिल्ल्याचो उल्लेख आदेशांत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
