भांगरभूंय | प्रतिनिधी
पणजीः शार उदरगत खातें आनी रान खात्यान गोंयच्या शार वाठारांनी शारी रान (अर्बन फॉरेस्ट) तयार करपाच्या ’ग्रीन लंग्स’ प्रकल्पाक गती दिल्या. पूण, प्रकल्पा खातीर सुवातो निश्चीत जावन लेगीत पणजी महानगरपालिका, म्हापशें नगरपालिका आनी कुंकळ्ळी नगरपालिकेन अजूनय आपल्या अधिकृत थरावा वरवीं गोंय सरकाराक आपलो निर्णय कळोवंक ना, अशी म्हायती शार उदरगत खात्याच्या वरीश्ठ अधिकार्यान दिली.
अधिकार्यान दिल्ले म्हायती प्रमाण शारांत वाडपी तापमान उणें करपा खातीर आनी पर्यावरणाचें संतुलन राखपा खातीर हो प्रकल्प सामको म्हत्वाचो थारतलो. १३ मे २०२५ दिसा आल्तिनो-पणजी हांगच्या गोंय वन भवन हांगा जाल्ले एका उंचेल्या पांवड्यावेले बसकेंत ह्या प्रकल्पाचेर सविस्तर चर्चा जाली. हो प्रकल्प नगरविकास खातें, वन खातें आनी थळाव्यो नगरपालिका हांच्या जोड पालवान मुखार वयता.
शारांनी पांचवी सुवात निर्माण करप, हो पर्यावरणा खातीर एक प्रभावी उपाय मानतात. वाडपी तापमान उणे करपा खातीर दाट वस्तीच्या वाठारांनी सैमीक रितीन थंडाय हाडप. हवेची गुणवत्ता सुदारपा खातीर शारांतल्या प्रदूशणाचेर नियंत्रण हाडप. जैवविविधतायेंत भर हाडपा खातीर थळाव्या झाडां-पेडां आनी जीव-जंतूंक आलाशिरो मेळोवन दिवप. लोकांचे भलायकी खातीर नागरिकांक विसव घेवपा खातीर आनी व्यायामा खातीर पाचवेशार, नितळ सुवातो उपलब्ध करून दिवप, हे उपक्रमाचो हेत आसा.
पणजी, म्हापशें आनी कुंकळ्ळी नगरपालिकांचे अधिकृत थराव येवपाचे आसले तरी, हेर नगरपालिकांनी अंमलबजावणीच्या कामांक सुरवात केल्या. हातूंत उत्तर गोंयचो पेडणें, सांखळी आनी डिचोली नगरपालिका जाल्यार दक्षिण गोंयचो मडगांव, मुरगांव, कुडचडें-काकोडा आनी केपें नगरपालिकांचो आस्पाव आसा.
हो प्रकल्प शास्त्रीय पद्दतीन आनी वेळार पुराय जावचो म्हूण रान खात्यान उत्तर गोंयचे रान संरक्षक आनी दक्षीण गोंयचे उप-रान संरक्षक हांची नोडल अधिकारी म्हण नेमणूक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
