भांगरभूंय | प्रतिनिधी
वॉशिंग्टन: चीन आनी रशियेच्या वाडट्या प्रभावाचो उल्लेख करून अमेरिकेचो अध्यक्ष डोनाल्ड ट्रम्प हांणी ‘ग्रीनलँडा विशीं कितें तरी करचेंच पडटलें’ अशी आपली भुमिका परतून जाहीर केल्या. ‘अमेरिकेन कारवाय करूंक ना जाल्यार रशिया आनी चीन भितर येतले आनी आमकां ते शेजारी म्हणून जायनात’ अशें ट्रम्प हांणी सांगलें. हाचे वयल्यान अमेरिका शेजारी देशांतली साधनसामुग्री बळयां आपल्या ताब्यांत घेवपाक सोदता, हें सिद्ध जालां.
तेल आनी वायूच्या वरिश्ठ कार्यकारी अधिकार्यां कडेन जाल्ले बसकेंत प्रसार माध्यमां कडेन संवाद सादतना ट्रम्प हांणी ही गजाल सांगली. ग्रीनलँडा विशीं विचारलें तेन्ना ट्रम्प हांणी म्हणलें, ‘तांकां आवडूं वा नावडूं, आमी ग्रीनलँडा विशीं कितें तरी करपाचें आसात. कारण आमी कितेंय केलें ना जाल्यार रशिया वा चीन ग्रीनलँडाचो ताबो घेतलो. ही डील सोपे रितीन करपाक म्हाका खूब आवडटलें, पूण तशें जालें ना जाल्यार आमी कठीण मार्गान तें करतले.’
सैन्यविस्तार करपाचे सुवातेर ग्रीनलँडवर मालकी हक्क कित्याक जाय? असो प्रस्न केलो तेन्ना ट्रम्प हांणी म्हणलें, ‘जेन्ना खंयचीय गजाल आपल्या मालकी हक्काची आसता, तेन्ना आमी तिचें संरक्षण करता. भाडेतत्त्वावेले सुवातेचें तशें संरक्षण करूं येना. देशांकडे मालकी हक्क आसप गरजेचें. ह्या वेळार तांणी आपणेंच ‘नाटो’ वाचवली असोय दावो केलो.
सैमीक साधनां युरेनियम आनी दुर्मीळ खनिजांनी समृद्ध आशिल्ल्या ग्रीनलँडार ताबो मेळोवपाचो यत्न ट्रम्प प्रशासनान परत सुरू केला. हाचे पयलीं २०१९तूय तांणी ग्रीनलँड विकतो घेवपाचो प्रस्ताव दिल्लो, जो डेन्मार्कान भायर मारिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
