भांगरभूंय | प्रतिनिधी
भांगरभूंय । प्रतिनिधी
केरी-सत्तरीः राज्यांतल्या गांवगिऱ्या वाठारांत आशिल्ल्या वाचपघरांत काम करपी कर्मचाऱ्यांक सामको कमी पगार मेळटा. फाटल्या जायत्या वर्सां सावन तांचो पगार वाडयल्लो ना. सरकारान आतां तरी आमचो विचार करून पगार वाड करची अशी मागणी तांणी केल्या.
राज्यांत गांवगिऱ्या वाठारांत सुमार 150 वाचपघऱां आसात. तातूंत ग्रंथपाल आनी सहाय्यक ग्रंथपाल मेळून 300 कर्मचारी आसात. ताका कला आनी संस्कृती खात्या कडल्यान पगार मेळटा. 2018 वर्सा ग्रंथपालाक 12 हजार आनी सहाय्यक ग्रंथपालाक 9 हजार रुपया असो पगार वाडोवन दिल्लो. हे गजालीक स वर्सा जालीं तरी त्याच पगाराचेर तांकां काम करचें पडटा. ताका पीएफ वा हेर कसलोय सरकारी सुविधा मेळनात.
राज्य सरकारान 2022 वर्सा कामगारांच्या किमान वेतन श्रेणींत सुदारणा केल्ली. त्या प्रमाण चड कुशळ कामगारां खातीर दिसाक 806, कुशळ कामगारां खातीर 734 आनी अकुशळ कामगारां खातीर 553 असो पगार थारायल्लो. ग्रंथपाल आनी सहाय्यक ग्रंथपाल कुशळ आनी अकुशळ कामगारांचे श्रेणींत येतात. मात तांका जो पगार दितात तो किमान वेतन श्रेणी परस उणो आसा. ह्या कर्मचाऱ्याचें एडेड लायब्ररी असोसिएशन आसा. ताच्या वतीन तांणी पगार वाडीची मागणी कला आनी संस्कृती खात्या कडेन केल्ली. पूण ताचे कडेन सेगीत आडनदर चल्ल्या अशें असोसिएशनाची अध्यक्ष सुप्रिया गांवस हिणे सांगलें.
गांवगिऱ्या वाठारांतल्या वाचपघरांनी काम करपी ग्रंथपाल आनी सहाय्यक ग्रंथपालांनी ह्या कामा खातीर जाय आशिल्लें शिक्षण घेतलां. ताका कला आनी संस्कृती खात्याक घेवपाचें आस्वासन दिल्लें मात ताचेर अजून मेरेन निर्णय जाल्लो ना. कांय जाण फाटल्या 15 तें 20 वर्सा सावन सामक्या उण्या पगारांत काम करीत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
