भांगरभूंय | प्रतिनिधी
भांगरभूंय । प्रतिनिधी
वाळपयः गोंयांतल्या ग्रामीण भलायकी केंद्रांचो दर्जो वाडोवपाची घोशणा भलायकी मंत्री विश्वजीत राणे हाणे म्हाऊस पंचायत वाठारांतल्या दाबे विद्यालयांत आयोजीत केल्ल्या भलायकी तपासणी शिबिराचें उक्तावण करतना सांगलें. लोकाचें जिणे शैलींत बदल जाल्ल्यान भलायकेच्यो समस्या वाडपाक लागल्यात. लोकांक बरी वैजकी सेवा उपलब्द करून दिवपा खातीर भलायकी केंद्रांचो दर्जो वाडोवपाची सूचोवणी आपणे भलायकी अधिकाऱ्यांक दिल्या अशें ताणे सांगलें.
बांबोळेच्या जीएमसीत 5 एप्रील सावन कॅन्सर ओपीडी विभाग सुरू करतले. कॅन्सर उपचारा खातीर गोंयच्या दुयेंतीक मुंबय आनी हेर कडेन वच्चें पडटलें. ही सुविधा आतां जीएमसीत मेळटली. ते खातीर तज्न दोतोरांची नियुक्ती केल्या अशी म्हायती तांणे दिली. दरेका तालुक्यांत वैजकी सेवेंत उदरगत करतले आनी सांगें तालुक्याक तातूंत प्राधान्य दितले. पंचायत वाठारांत वैजकी शिबिराच्या माध्यमांतल्यान लोकाचे भलायकेची तपासणी करपाचेर भर दितले अशेंय विश्वजीत राणे हांणी सांगलें.
जीएमसीतल्या तज्ज्ञ दोतोरांक गांवगिऱ्या वाठारांतल्या भलायकी तपासणी शिबिरांत हाडून जीएमसी तुमच्या दारांत ही नवी संकल्पना भलायकी मंत्र्यान चालीक लायल्या अशें पर्येची आमदार दिव्या राणे हिणे ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
