भांगरभूंय | प्रतिनिधी
मुख्यमंत्री डॉ. प्रमोद सावंतः ग्रामीण पर्यटनाक सगळे तरेचो आदार दिवपाक तयार
भांगरभूंय । प्रतिनिधी
दिवचलः गोंय पर्यटन मळार खूबशे नवे बदल घडटना ग्रामीण वाठारांत पर्यटनाक विवीध माध्यमांतल्यान चालना दिवपाची गरज आसा. भलायकी, अध्यात्म, वॉटर स्पोर्टस् आनी हेर माध्यमांतल्यान ग्रामीण वाठारांत पर्यटनाक चालना दिवपाची गरज आसा, अशें मुख्यमंत्री डॉ. प्रमोद सावंत हांणी सांगलें.
सर्वराज इकॉ फार्मच्या गोवा एक्वा वर्ल्ड ह्या वॉटर एडवेंचर आनी पार्काचें उक्तावण मुख्यमंत्री डॉ. सावंत हांचे हस्तुकीं जालें. ह्या वेळार ते उलयताले. तांचे वांगडा पर्यटन मंत्री रोहन खंवटे, आमदार डॉ. देविया राणे, आमदार प्रेमेंद्र शेट, रती गांवकार, रमापती पित्रे, नरेश सावळ, महेश कांदोळकार हाजीर आशिल्ले.
गोंयांतल्यो दर्यादेगो भरल्यात, आतां ग्रामीण पर्यटन वाडोवप गरजेचें आसा. गांवांत नवे उददेग येवप गरजेचें आसा. ताका सगळ्यांनी आदार करचो, जे वरवीं अर्थीक उदरगत आनी रोजगार संधी निर्माण जातल्यो. सरकार ग्रामीण पर्यटनाक जो फुडें येता जाल्यार सिंगल विंडो माध्यमांतल्यान आनी सगळे तरेची मजत करपाक तयार आसा. गोंयचो पर्यटन उद्देग व्हड संद दिवपी आसा. तातूंत व्हड प्रमाणार गुंतवणूक करची, अशें मुख्यमंत्री डॉ. सावंत हांणी सांगलें.
मंत्री रोहन खंवटे हांणी सांगलें, ग्रामीण वाठारांत तिगांनी नवें धाडस करतना वॉटर स्पोर्टस् सुरू करून रोजगार आनी उद्देगाक चालना दिल्या. पर्यटन खात्यान पर्यटन मळार विशेश येवजण चालीक लायतना कला संस्कृतीक चालना दिवप, गांवांतल्या सैमीक पर्यटनाक चालना दिवप, होम स्टे खातीर येवजण हातांत घेतले. तशेंच साबार आधुनीक सुविधा दिवप आनी पर्यटकांक गोंयची खरी वळख निर्माण करचे खातीर साबार नवे उपक्रम हातांत घेतल्यात, अशें तांणी सांगलें.
ग्रामीण पर्यटनाक गोंयांत व्हड संद आसा. मयें पर्यटन केंद्राची आधुनीक उदरगत करतले, अशें आमदार प्रेमेंद्र शेट हांणी सांगलें.
ग्रामीण वाठारांत पर्यटनाक व्हड संद मेळप गरजेचें आसा. व्हड प्रकल्प आयले उपरांत उदरगत आनी रोजगाराक चालना मेळटली, अशें आमदार डॉ. देविया राणे हांणी सांगलें. नरेश सावळ हांणी येवकाराच्या उलोवपांत सांगलें, ग्रामीण पर्यटनाक चालना दिवचे खातीर सरकारान आदार करतना रोजगार तशेंच अर्तीक क्रांती घडोवप शक्य आसा. हें फार्म खऱ्या अर्थान पर्यटनाक चालना दिवचे खातीर येसस्वी थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
