भांगरभूंय | प्रतिनिधी
‘टुगेदर फॉर म्हापसा’चें पालिका प्रशासन संचालनालयाक निवेदन
पणजीः पंचायत पांवड्यार जश्यो ग्राम सभा जातात तशेंच पालिका पांवड्यार प्रभाग वा नगर सभा घेवच्यो. हे खातीर संविधानांत तरतूद लेगीत आसा. पालिकांनी जर ह्यो सभा जाल्यो सामान्य लोकांक आपले विशय मांडपाक मेकळीक मेळटली, अशें टुगेदर फॉर म्हापसाचे महेश राणे हांणी सांगलें.
टुगेदर फॉर म्हापशें ह्या फोरमाचें एका शिश्टमंडळान पालिका प्रशासनाचे उप संचालक तशेंच सचीव हांकां एक निवेदन भेटोवन आपली मागणी मांडली. ह्या वेळार फोरमाचे वांगडी जितेश कामत, विजय भिके आनी हेर हजर आशिल्ले.
लोकशाय जर गिरेस्त करतले जाल्यार पंचायत पांवड्यार जश्यो ग्रामसभा जातात तेच पध्दतीन प्रभाग वा नगर सभा राज्यातल्या पालिकांनी जावपाची गरज आसा, अशें राणे हांणी म्हणलें.
पालिका वाठारांनी संविधानात हाची तरतूद आशिल्ल्यान घटनेचे कलम २४३ (स) खाला ७४ सुदारणा प्रमाण दरेक राज्यांतल्या पालिकांनी ही प्रभाग सभा वा नगर सभा जावपाची गरज उक्तायल्या. केरळ, आंध्र प्रदेश, मध्य प्रदेश हे सगळ्या राज्यांनी नगर सभा जाल्ल्यो आसा. पूण गोंयांत अजूनय असल्यो सभा जायना, अशी कागाळ राणे हांणी केली.
नगर वा प्रभाग सभा ह्या माध्यमांतल्यान लोकशायेक आनीख बळकटी मेळटली. हे माचये वेल्यान सामान्यांतले सामान्य मनीस आपले प्रस्न आसा ते पालिकेच्या बसकेत मांडून आपलो आवाज हे माध्यमांतल्यान तो सरकारा मेरेन पावपाक शकता. हे विशींचो मसुदो आमी तयार करून दिला आनी संविधानांतल्यो तरतुदी आमी मांडल्यात, अशी म्हायती राणे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
