भांगरभूंय | प्रतिनिधी
माजोड्डें- उतोड्डें- कलाटाच्या लोकांक जाय आशिल्ली उदरगतीचेर चर्चा
भांगरभूंय | प्रतिनिधी
मडगांव : माजोड्डें- उतोड्डें- कलाटाची विशेश ग्रामसभा सरपंच अँथिया लिन परेरा हांचे अध्यक्षते खाला आयतारा जाली. ह्या वेळार उरिल्ल्या उदरगतीच्या कामांचेर चर्चा करपाची मागणी नागरिकांनी लावन धरली. विशेश ग्रामसभा आशिल्ल्यान अर्थसंकल्पाचेरूच चर्चा जातली अशें सरपंचांनी सांगताच चडश्या लोकांनी ग्रामसभा अर्दवटूच सोडली. उपरांत उरिल्ल्या लोकांचे हाजेरेंत अंदूंचो अर्थसंकल्प संमत केलो.
ग्रामसभेचे सुरवातेकूच कांय लोकांनी ग्रामसभेंत गांवच्या हेर समस्यांचेर कित्याक चर्चा जायना? असो आक्षेप घेतलो. लोकांचे प्रस्न मांडपाक आनी ताचेर उपाय काडपाक नेमान ग्रामसभा घेवपाची गरज आसता. मात पंचायत वांगडी एकतर्फी निर्णय घेता, असो आरोप लोकांनी केलो. हाचे पयलींच्यो चार ग्रामसभा रद्द जाल्ल्यान लोकां मदीं तिडक वाडल्या.
हाचेर सरपंच परेरा हांणी लोकांक समजावपाचो यत्न केलो. ही विशेश ग्रामसभा फकत अर्थसंकल्प मंजूर करपा खातीर आपयल्या. फाटल्या चार म्हयन्यां पसून कोयर संकलनाचे पयशे दिवचे उरल्यात आनी हेर खर्च बंद जाल्यात. हाका लागून लोकांचे सुविधे खातीरूच हो अर्थसंकल्प संमत करप गरजेचें आशिल्ल्याचें तांणी स्पश्ट केलें. अॅड. राधाराव ग्रॅसियस आनी नेली रॉड्रिग्ज हांच्या सारकिल्ल्या कांय लोकांनीय सरपंचांचे भुमिकेक फाटबळ दिवन हेर विशय फुडले ग्रामसभेंत चर्चेक घेवपाची सुचवणी केली.
मात, सरपंचांनी आपली भुमिका कायम दवरताच सचिवान अर्थसंकल्पाचें वाचन सुरू केलें. हाका लागून बेजारून चडशे लोक सभाघरांतल्यान भायर गेले. उपरांत हजर राविल्ल्या कांय लोकांनी विचारिल्ल्या दुबावांचेर जापो दिले उपरांत सरपंच अँथिया लिन परेरा हांणी 2025-26 चो अर्थसंकल्प मंजूर जाल्ल्याचें जाहीर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
