भांगरभूंय | प्रतिनिधी
वा चपघरांत वचपी खंयच्याय वाचकाचो ग्रंथपाला कडेन संबंद येताच. तुमकां जर ग्रंथपाल जावपाचें आसा जाल्यार तुमी शिवोलेच्या एसएफएक्स उच्च माध्यमीक विद्यालयाचे ग्रंथपाल सदानंद नायक हांचे कडेन संपर्क करचो. ग्रंथपाल पदा वयल्यान ते निवृत्त जाल्यात. ते ग्रंथपालांची संघटना चलयतात. ग्रंथपालांक बरी वागणूक, बरी वेतन श्रेणी तांणी मेळोवन दिल्या. ते खातीर तांकां शिक्षण अधिकाऱ्यां कडेन झगडचें पडलां. कांय वेळार वायटपणूय घेवचें पडटलां. पूण तांणी सदांच ग्रंथपालाचें बरें चिंतलें. ते सांगतात, ‘आपल्या गिन्यानाचो फायदो वाचपघरांत येवप्यांक मेळचो म्हूण वाचकाक सगली म्हायती, सहकार्य दिवंक जाय.’
श्री. नायक हांणी लायब्ररी सायन्साचें शिक्षण घेतलां. ग्रंथपालाचो संबंद वाचप्यां कडेन येता, देखून तुमचो संवाद बरो आसपाक जाय. तुमकां कितलो ताण आसूं, तुमी तुमचें कर्तव्य, गोड उलोवप सोडपाक जायना. वाचपघरांत येवपी वाचकाची आवड तुमकां खबर आसपाक जाय. ह्या फाट्यांत शिक्षण घेवन तुमी शिक्षण संस्थांनी, शाळांनी काम करपाक शकतात. सरकारी कार्यालयांनीय तुमी काम करुं शकतात. खाजगी वाचपघरांनीय तुमकां नोकरी मेळूंक शकता.
आंता ग्रंथपाल मळाचेर आधुनीक तंत्रज्ञान आयलां. श्री. नायक हांच्या मतान, ‘तुमी बरे वाचक आसपाक जाय. जो वाचक वाचपघरांत येता, ताका तुमी तुमच्या गिन्यानाचो फायदो करून दिवंक जाय. तुमी लायब्ररी सायन्स विशय शिकिल्ले आसल्यार चड बरें. हें शिक्षण बऱ्या विद्यापीठांनी मेळटा. जर तुमकां उच्च पदाचेर काम करपाचें आसा जाल्यार तुमी ग्रंथपाल विशयांत डाॅक्टरेट (पीएचडी) घेवंक जाय. म्हणटकच तुमकां क्युरेटर जावपाची संद मेळूं येता. पूण तुमकां ग्रंथपालाचो डिप्लोमा तरी आसपाक जाय. मागीर तुमी तुमचें शिक्षण वाडोवंक शकतात. ह्या वेवसायांत समाजसेवाय करूं येता. वाचकाचे आवडीचीं पुस्तकां तुमी पयलींच काडून दवरल्यार तुमचो, ताचो वेळ वांचूंक शकता. श्री. नायक सांगतात, ‘हांव पुस्तकां तयार दवरतालों, म्हूण जायते वाचक म्हजेर खूश आशिल्ले. ती सुवात वेंचिक लोकां खातीर आशिल्ली. सगलींच पुस्तकां तुमी व्हरूंक, वाचूंक शकनात. तरीय वाचकाक जाय त्या विशया वयलें पुस्तक खंयचें तें कळप तशें कठीण न्हय. कांय गजाली नेमान केल्यार तुमकां यश मेळटा. जर तुमचो वाचक वा बरोवपी कवी आसा, ताचें लिखाण दिसाळ्यांत छापून आयलां जाल्यार तें नोटीस फलकाचेर लावपाक जाय. तशें केल्यार तो विद्यार्थी तुमकां जीणभर विसरचो ना. हांवें जिणेंत असलीं कामां केल्यांत. कांय खेपे लोकांचें वायटपणूय घेतलां.’
बऱ्याच ग्रंथपालां खातीर हांवें वरिश्ठ अधिकाऱ्यां लागीं वायटपण घेतलां. कांय कामां अशीं आसतात की तांकां सगल्यांचो हातभार जाय पडटा. ग्रंथपाल अभ्यासक्रम देशांत पयलीं सुरू केलो बडोदा शारांतल्या गायकवाड संस्थानान. 1913 त तो सुरू केल्लो. इंटरनेट आसलें तरी पुस्तकांची गरज कमी जावंक ना. तरीय ग्रंथपालान हें नवें तंत्रज्ञान शिकूंक जाय. म्हायती दिवपाक, घेवपाक हाची खूब मजत जाता. गोंयां भायल्या जायत्या विद्यापीठांत हो अभ्यासक्रम शिकयतात. गोंयांत गोंय विद्यापीठ वा इग्नू हातूंत तुमी तो करपाक शकतात. मुद्दाम तांची वेबसायट पळयात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
