भांगरभूंय | प्रतिनिधी
दरवर्सा ग्रंथपाल दीस ९ ते १२ आॅगस्ट मेरेन मनयतात. ते निमतान विशेश लेख.
विद्यार्थ्यांचे जिणेचे घडणेंत जसो आवय- बापूय, शिक्षकांचो हात आसता, तसोच हात ग्रंथपालांचो पसून आसता. शिक्षणीक वाटचालींत ग्रंथपाल हो मार्गदर्शक आसता. कारण खंयच्याय विशयाचें ज्ञान, संदर्भ मेळोवपाक विद्यार्थ्यांक ग्रंथपालाची मजत घेवचीच पडटा. देखून ग्रंथपालाक खंयचें पुस्तक खंय आसा, तें खबर आसपाक जाय. साबार विशयाचें गिन्यान ताका जाय. निदान जुजबी म्हायती तरी आसपाकूच जाय. कारण अचकीत विद्यार्थी वा हेर कोणूय ग्रंथालयांत आयलो जाल्यार ताका तें पुस्तक रोखडेंच मेळपाक जाय. ते विशींचीं हेर संदर्भ पुस्तकां खंय आसात, तें ग्रंथपालाक खबर आसपाक जाय.
विद्यार्थी आपल्या यशाचें स्रय आवय- बापूय, शिक्षकांक दितात. मात सहसा कोणूच ग्रंथपालाक तें दिनात. तरीय ग्रंथपाल आपली सेवा इमाने इतबारे म्हणटात तशी करतात. म्हूण गुरुक जितलो मान दितात, तितलो ताकाय दिवपाक जाय. वर्गांत शिक्षक शिकयतात, पूण त्या विशयाची खोलायेन म्हायती विद्यार्थ्यांक दिवन ग्रंथपाल तांकां अभ्यासांत मजत करीत आसता. विद्यार्थ्याची आवड मतींत घेवन ताका ताचें करियर वेंचून काडपाकूय तो मजत करपाक शकता.
समाजांत वाचन संस्कृताय रुजोवपाक ग्रंथपाल व्हड योगदान दिता. कारण तशें केल्यार विद्यार्थ्यां मदीं वाचन संस्कृताय रुजता. कांय जाण हाच्याच बळग्यार जिणेंत खूब मुखार पावतात. आयज साबार तरांची ग्रंथालयां गांवांगांवांनी आसात. तातूंत सगले ग्रंथपाल बरें काम करतात, पूण तरीय कांयजाण उपेक्षीत उरतात. मात ग्रंथपाल कसलीच अपेक्षा दवरीनासतना लोकांक सेवा दिवपाचें व्रत चालूच दवरतात.
आयच्या ग्रंथपाल दिसा निमतान सगल्या आदल्या, आतांच्या ग्रंथपालांक परबीं.
– मानसी महेंद्र बांदोडकार
9604250238
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
