भांगरभूंय | प्रतिनिधी
वाचनाचें म्हत्व सगल्यांनी सांगलां डॉ बाबासाहेब आंबेडकर तर म्हणटाले, वाचश्यात तर वाचतले. वाचन वाडोवपाचे काम ग्रंथपाल चड करतात, हातूंत कोणे दुबाव घेवचो न्हय. पूण हांचें शिक्षण घेतलें तरच तुमकां प्रशिक्षण मेळटलें आनी वाचनाची गरज दुसऱ्यां मेरेन पावोवप शक्य जातलें, गोंयां भितर हें शिक्षण दिवपाचें काम आतां गोंय अभियांत्रिकी कॉलेजांत जावपी स म्हयन्यांच्या कोर्सान तुमी करूं शकतले. ह्या कोर्सा भितर तुमकां वाचनालय वेवस्थापन, विशया प्रमाण वर्गीकरण करप, म्हायती सुदारणा, डिजिटल वाचनालया सारके विशय शिकूंक मेळटलें. शाळांची ग्रंथालयां, भौशीक ग्रंथालयां, हेर शैक्षणिक वेवसायिक ग्रंथालयां हातून नोकरी वा सेवा करतल्यांक हो अभ्यासक्रम खूब म्हत्वाचो. खंयच्याय फाट्याचो बारावी पास जाल्लो उमेदवार ह्या अभ्यासक्रमांक पात्र थारता.
फाटल्या सप्तकांत बारावेचो निकाल जाला, त्या विद्यार्थ्यांनी लेगीत ग्रंथपाल अभ्यासक्रमांचो जरूर विचार करचो. गोंय अभियांत्रिकी कॉलेज, फर्मागुडी तुमी पावल्यात आसतले. 1967 सालांत सुरु जाल्ले हें वेवसायिक कॉलेज 285 एकर सुवातेचेर फोंडें- फर्मागुडी हांगां विस्तारलां. हेच कॉलेजीन स म्हयन्यांचो कोर्स सुरु केला. आदमासान 97 हजार पुस्तकां, 100 एक म्हयन्याळीं आनी इ- बुकाची वेवस्था आशिल्ल्या ह्या कॉलेजीच्या ग्रंथालयाचो उपेग हो स म्हयन्यांचो कोर्स करपी उमेदवाराक मेळटलो. गोंयांत सगळ्या तालुक्यांच्या मुखेल शारांनी एक तरी ग्रंथालय आसा. भौशीक, सरकाराची मजत मेळपी खाजगी ग्रंथालयां आसात. थंयचे कर्मचारी तशेंच ह्या फाट्यांत काम करपाक इत्सुक नवे कर्मचारी हे प्रशिक्षित आसचे म्हूण मे 2018 सावन हो कोर्स सुरु केल्लो. ह्या स म्हयन्यांच्या कोर्सा भितर तुमकां दोन म्हयन्यांचें प्रॅक्टिकल अणभव विंगड विंगड ग्रंथालयांत मेळपाची वेवस्था आसा.
ह्या जुना सावन सुरु जावपी हो कोर्स सोमार ते शुक्रार 2 ते 5 ह्या वेळार आसतलो. बारावी पास जाल्ले आनी ग्रंथालय भितर करियर करपी 30, चडान चड 50 विद्यार्थ्यांक ह्या कोर्साक संधी मेळटली. जे ग्रंथपाल म्हूण कामाक आसात, तांकां प्रवेशा खातीर प्राधान्य मेळटलें. ह्या कोर्साची फी आठ हजार आसा. भितर तुमकां पुस्तकांची शास्त्रशुद्ध वळेरी कशी करप, संदर्भ सेवा, ताचे म्हत्व, ह्या वळेरीन येवपी पुस्तकां, ग्रंथालयातली वेवस्था, कॉल नंबर म्हळ्यार कितें ? डॉ एस आर रंगनाथन हांचे ग्रंथालयाक दिल्ले योगदान, ग्रंथालयाचीं तत्वां, पुस्तकां उपेगा खातीर आसता, प्रत्येक पुस्तकाक वाचक आसता, ग्रंथालय वाडटी संघटना, हाचो नेमको अर्थ, भारतातलो ग्रंथालय इतिहास, गोयांतलो ग्रंथालय इतिहास, ग्रंथालयाचे कायदे, विंगड विंगड शब्दकोश, तांचे महत्व कसो उपेग करपाचो हे सारके विशय जे तुमकां परिक्षेक आसतले ताची तयारी हातून जातली. मेळिल्ली म्हायती तुमकां काम करताना उपेगी पडटली.
दिसान दीस पुस्तकां प्रकाशित जायत आसात, तेन्ना तुमचो वावर जसो वाडला तशें हांचें ज्ञानूय मेळपाची गरज वाडल्या. पुस्तकां पोरणीं जाता तशी तांची देखभाल करची पडटा. म्हूण तर कोर्स करप चड गरजेचें आसा. गोंयांतल्या इत्सुक उमेदवारांक हें शिक्षण घेवपाची बरी सुविधा सरकारी माध्यमातल्यान फर्मागुडी इंजिनिअरिंग कॉलेजांत आसा, ताचो तुमी जरूर लाव घेयात. म्हायती दिवपी तज्ञ गोंयच्याच ग्रंथालयांनी काम करतात, हाका लागून तुमचे दुबाव तुमी तांकां विचारू शकतात. प्रवेश घेवच्या पयली तुमी संकेतस्थळातल्यान ना जल्यार एखाद्या ग्रंथालयान काम करपी कर्मचाऱ्या कडल्यान म्हायती घेवं शकता. पूण ताचे पयली तुमी सभासद जायात आनी ग्रंथालया संबंधी पुस्तकां, साहित्य वाचपाक सुरवात करशात तर अधिक बरें. ह्या कोर्साची चड म्हायती तुमकां जाय तर तुमी ह्या कोर्साचे निमंत्रक डॉ अक्षय निगळ्ये (80802047/9763465511 ना जाल्यार 0832- 2336392 हांगा फोन केल्यार मेळूं शकता.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
