भांगरभूंय | प्रतिनिधी
पणजी : ग्रँड हयातचे बांबोळे सर्वे क्रमांक १२/१ आनी ९९/२त आशिल्लें बांदकाम हें सीआरझेड नेम भंग करपी आशिल्ल्यान ते बंद करपाचो आदेश गोंय दयारदेग वेवस्थापन प्राधिकरणान (जीसीझेडएमए) दिला. तशेंच हें बांदकाम मोडपा संबंदीची नोटीसूय दिल्या. हे विशींची सुनावणी २४ एप्रिलाक दनपरां ३.३० वरांचेर पाटो – पणजेच्या जीसीझेडएमएच्या कार्यालयांत जातली. ह्या वेळार हॉटेलाच्या अधिकृत अधिकार्यान बांदकाम तशेंच जीसीझेडएमएचे परवाने सादर करप गरजेचें.
बांबोळे ग्रँड हयाता कडेन सीआरझेड कायदो मोडीत बेकायदो बांदकाम सुरू आशिल्ल्याची कागाळ थळावे आमदार विरेश बोरकार, प्रा. रामराव वाघ तशेंच हेरांनी केल्ली. हे कागाळीची दखल घेवन गोंय दर्यादेग वेवस्थापन प्राधिकरणाच्या (जीसीझेडएमए) अधिकार्यांनी बांधकामाची पळोवणी केली. १० मीटर लांबायेचें आनी ३.२ मीटर उंचायेचें बांदकाम पुराय जालां. बुन्यादीचें बांदकामूय पुराय जालां. हो वाठार सीआरझेड – ३ त येता. सीआरझेड अधिसुचवणी २०११ प्रमाण न्हंये पसून १०० मीटर आनी दर्या पसून ५०० मिटर अंतरा मेरेन बांदकाम करपा खातीर जीसीझेडएमएची परवानगी घेवप गरजेचें. हें बांदकाम सीआरझेड नेम मोडपी आशिल्ल्याचो उल्लेख आदेशांत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
