गौरांगाचो हरी रंग!
भांगरभूंय | प्रतिनिधी
गौरांगाचो हरी रंग अंदू चवथीक ताच्या घरांत केल्ल्या विठ्ठलमय कलाकृतींत दिसून येता. पोरणे अशे फातरांत कोरून तयार जाल्ले रानांतलें विठ्ठलाचें देवूळ आनी हरीभक्तींत एकरूप जाल्ले संत तुकाराम म्हाराज रूपांतलो गणपती दोनूय कलाकृती पोरणी अशी बांदावळ तशेंच हरीभक्तीची आदली परंपरा हांचो सांगोड घालता. वारकरी संप्रदायांतल्या विठ्ठल जयघोषांत लीन जाल्ल्या वारकऱ्यांचें प्रतिनिधीत्व ह्या देखाव्यांत करपी हुंदीर मामा हाचीय जोड देखाव्याच्या खाशेलपणांत आनीकय भर घालता.
शेळवण- कुडचडेंच्या गौरांग दयानंद नायक ह्या कलाकारान चवथीक हरी भक्तीच्या कलारंगान रंगिल्ली कलाकृती अजंठा, एलोरा गुहेंतल्या देवळांच्या स्वरूपांत साकारल्या. पुठ्ठो, स्क्रॅप लाकूड, प्लायबोर्ड, रंग आणि वनस्पतींचो उपेग करून ताणे पुराय कलाकृती निर्मिल्या. हाकाच लागून ती टिकावू आनी पुरायपणान पर्यावरणपूरक आसा. देखून गौरांग बाब सैमा कडेन इश्टागत जुळोवपाचोय संदेश आमकां दितात.
गोंयांत लेगीत विठ्ठल भक्तीची परंपरा आसा. आषाढी एकादशीचे वारीक पंढरपूराक चलून वचपी पांडुरंगाचे हजारांनी भक्त गोंयभर आसात. तें व्हडा भावार्तान विठ्ठलाची आराधना करतात. संत तुकोबा, संत ज्ञानेश्वर, संत एकनाथ, संत जनाबाई आदीं संतांनी विठ्ठलाच्या भक्तीचे अमृत भक्तांक दिले. तांणी भक्ती साधनेंत दिल्ले योगदान भोव म्हत्वाचें थारता. तांणी देव भक्तीचो सरळ मार्ग संवसारांत दाखोवन दिलो. देवाचे अंतस्कर्णांतल्यान घेतिल्ले नांव लेगीत देवाक प्रसन्न करता अशें सांगून ताणी देव भक्तीची सोपी वाट दाखयली. तांणी रचिल्ले अभंग तर आयजूय भजनाच्या माध्यमातल्यान गायतात. अभंग हें भक्ती साहित्यांत भोव म्हत्वाचें आसात.
संत तुकाराम म्हाराज जांकां जगद्गुरू म्हूण पुराय संवसारांत लोक मानतात, तांची अभंगवाणी म्हणल्यार हरी भक्तीची संजीवनीच. तांणी तांच्या अभंगांतल्यान समाज प्रबोधनूय केला. अश्या संत तुकारामांच्या रूपांतली गणेश मुर्त गौरांगबाब हांणी स्वता तयार केल्यात. ही एक लक्षवेधी गजाल. ताका लागून कलाकाराचें विशेश कौतूक. तांणी घडयल्ल्या मुर्तींतल्यान हरीभक्ती आनी श्रीगणेश आराधना हांचो मेळ जाल्लो दिसून येता. गणेशाचे वाहन आशिल्लो मुषक एका वारकऱ्याच्या रूपांत विठ्ठल भक्तींत तल्लीन जाल्लो दिसता. हिवूय मुर्त तांणीच निर्माण केल्या. फांटल्यान उबी आशिल्ली पोरण्या देवळांतल्या विठ्ठलाची मुर्त भाविकांचें मन आनी काळीज जिखून घेता. कलाकार गौरांग बाब हांणी केल्ली अशी हीं सोबीत कलाकृती हरिभक्तीची स्पंदनां कलामोगीं तशेच भक्तांच्या काळजांत रूजवणाक हाडपाक येसस्वी थारतात. आनी हेंच कलाकार गौरांग हांच्या कलासाधनेचेय जैत थारता.
हरी रे म्हाज्या गणराया
सख्याहरी म्हाज्या मोरया…
गौरांग गोकुळदास नायक
[email protected]
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
