भांगरभूंय | प्रतिनिधी
हळदोण्यां उज्या लोळ प्रकरण
पणजी : दिल्लींतल्यान फुकेत – थायलंड हांगां पळून गेल्ल्या बर्च बाय रोमिओ लेन क्लबाचे धनी गौरव आनी सौरभ लुथरा हांकां ताब्यांत घेवपा खातीर पुलिसांचें यत्न सुरू आसा. पुलिसांच्या यत्नांक कांय प्रमाणांत येस आयलां. आतां इंटरपोलान तांचे आड ब्ल्यू कॉर्नर नोटीस जारी केल्या. तशेच क्लबाकडे संबंद आशिल्ले भागिदार अजय गुप्ता हाका दिल्लींत अटक केल्या. ह्या प्रकरणांत आतां मेरेन 6 जाणांक अटक जाल्या. मजगतीं, सुरींदरकुमार खोसला सांपडूंक ना, ते खातीर तांचे आड लूक आऊट सर्कुलर जारी केला. गौरव आनी सौरभ लुथरा हांकां पासपोर्ट कार्यालयानूय नोटीस जारी केल्या. नोटिशीक 7 दिसांत जाप दिवंक ना जाल्यार तांचो पासपोर्ट जप्त करपाची शिटकावणीय दिल्या, अशी म्हायती पुलिसांनी दिल्या.
शेनवारा रातीं बर्च बाय रोमिओ लेन क्लबाक उजो लागून 25 जाणांक मरण आयलें. ह्या घडणुके उपरांत पुलिसांनी बेगोबेग कारवाय सुरू केल्ली. तांणी गुन्यांव नोंद करून तपास चालू केल्लो. मात, तितल्या म्हणसर क्लबाचे धनी विदेशांत पावले, जाल्यार सह-धनीय गायब जाले. पुलिसांनी भा. न्या. सं.च्या कलम 105, 125, 125 (ए), 125 (बी), 287 आनी 3 (5) खाला गुन्याव नोंद केला.
उजो लागलो म्हूण कळटाच फातोडेर गौरव आनी सौरभ लुथरा हे फुकेत – थायलंड हांगां विमानान गेले म्हूण पुलिसांक म्हायती मेळिल्ली. इंटरपोलाचे मजतीन तांकां भारतांत हाडपा खातीर यत्न चल्ल्यात. तांचें आड रेड कॉर्नर नोटीस काडल्या, अशी म्हायती पुलीस उपम्हानिरीक्षक वर्षा शर्मा हांणी पत्रकार परिशदेंत म्हायती दिली.
निलंबीत अधिकाऱ्यां कडल्यान कागदपत्रां घेतली ताब्यात
ह्या घडणुके उपरांत सरकारान निलंबीत केल्ले तेन्नाची पंचायत संचालक सिद्धी हळणकार आनी प्रदुशण नियंत्रण मंडळाची तेन्नाची वांगडी सचीव शमिला मोंतेरो आयज चवकशे खातीर हणजूण पुलीस स्टेशनांत हाजीर आशिल्ली. हडफडे – नागवाचे तेन्नाचे पंचायत सचीव रघुवीर बागकार हांचीय चवकशी जाली. हणजूण पुलिसांनी तिगांकूय सोमारा नोटीस जारी केल्ली. मंगळारा चवकशे वेळार तांकां कागदपत्रां हाडपाक सांगिल्लीं. ती कागदपत्रां ताब्यांत घेतली.
समिती स्थापन
मजगतीं, पर्यटन वेवसाया कडेन संबंदीत हॉटेलां, क्लब आनी हेर आस्थापनांनी उजो प्रतिबंधक आनी हेर सुरक्षेच्या उपायांची तपासणी करपा खातीर सरकारान वरिश्ठ नागरी सेवा अधिकाऱ्यांचे अध्यक्षते खाला समिती स्थापन केल्या. समितीचे वांगडी अशे आसात : अध्यक्ष : वरिश्ठ श्रेणी नागरी सेवा अधिकारी, वांगडी : पुलीस निरीक्षक, स्टेशन फायर ऑफिसर, कार्यकारी अभियंतो (पीडब्ल्यूडी), कार्यकारी अभियंतो (वीज खाते).
ही समिती पर्यटन वेवसाया कडेन संबंदीत आशिल्ल्या आस्थापनांची तपासणी करतले. तपासणी खातीर तालुका पांवड्यांरूय समित्यो स्थापन केल्यात.
आमदार लोबो हांची विवीध खात्यां वांगडा बसका
मजगतीं, कळंगुटचे आमदार मायकल लोबो हांणी उजो पालोवपी दळ, पुलीस, एफडीए, टीसीपी आनी भलायकी खात्याच्या अधिकाऱ्यां वांगडा बसका घेतली. दर्यादेगां वेल्या आस्थापनांनी सुरक्षा उपायांचेर चर्चा जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
