भांगरभूंय | प्रतिनिधी
पणजीः गोंयांत मोबायल शेणप वा चोरी जावपाचो आंकडो वाडत आसा. 2020 ते 2024 ह्या काळांत राज्यांतल्या वेगवेगळ्या पुलीस स्टेशनांनी 36,575 मोबायल फोन शेणपाच्या वा चोरयेक गेल्ल्याच्यो कागाळी नोंद जाल्यात. हाचो अर्थ वर्साक सरासरी 7,115 मोबायल फोन शेणटात वा चोरयेक वतात. ही म्हायती मुख्यमंत्री डॉ. प्रमोद सावंत हांणी विधानसभेंत लेखी जापेंत दिल्या. आमदार एल्टन डिकॉस्टा हांणी हे विशीं एक प्रस्न विचारिल्लो.
जापेंत दिल्ले म्हायती प्रमाण, पुलिसांक वट्ट चोरयेक गेल्ल्या मोबायलांतले फकत 1,569 मोबायल (4.2 टक्के) मोबायल फोन सोदून काडपाक येस मेळ्ळां. पुलिसांनी मेळिल्ल्या 1,569 मोबायल फोनांतले 1,356 मोबायल फोन कागाळदारांक परतून केल्यात. फाटल्या पांच वर्सांत 8,995 मोबायल फोन शेणपाच्यो वा चोरी जावपाच्यो सगळ्यांत चड कागाळी 2023 वर्सा नोंद जाल्यो. हातूंतले 450 फोन पुलिसांनी परतून मेळयले, आनी 447 कागाळदारांक तांचे फोन परत दिले. त्या वर्सा सगळ्यांत चड 2,765 फोन शेणप वा चोरी जाल्ल्याच्यो कागाळीं कळंगूट पुलीस स्टेशनांत नोंद जाल्ल्यो.
तशेंच 2024 वर्सा मोबायल फोन चोरयेक गेल्ल्या विशीं 8,757 कागाळी दाखल जाल्ल्यो. तातूंतले 367 फोन पुलिसांनी परतून मेळयले, आनी 360 कागाळदारांक तांचे फोन परतून दिले. 2022 वर्सा चोरिल्ल्या मोबायल फोना विशीं 8,295 कागाळी दाखल जाल्ल्यो. तातूंतले 338 फोन पुलिसांनी परत मेळयले, आनी 337 कागाळदारांक तांचे फोन परतून दिले. 2021 वर्सा मोबायल फोन शेणिल्ल्या विशीं 6,028 कागाळी दाखल जाल्यो. तातूंतले 171 फोन पुलिसांनी मेळयले आनी सगल्या 171 कागाळदारांक तांचे फोन परतून दिले, अशें जापेंत नमूद केला.
———————
822 मोबायल सनबर्न महोत्सवां वेळार चोरयेक गेल्ल्याचे वा शेणिल्ल्याचे जापेंत नमूद केला. 2020 ते 2024 ह्या काळांत राज्यांत जाल्ल्या सनबर्न इलॅक्ट्रॉनीक संगीत महोत्सवांत मोबायल फोन चोरयेक वा शेणिल्ल्या विशीं 822 कागाळी दाखल केल्यात. तातूंतले फकत 66 फोन पुलिसांक मेळ्ळे. मेळिल्ले सगळे 66 फोन तांच्या कागाळदारांक परतून दिले.
——————
कळंगूट वाठारांत चड कागाळी
कळंगूट पुलीस स्टेशनांत 2020, 2021 ते 2023 ते 2024 ह्या काळांत सगळ्यांत चड 7,653 मोबायल फोन चोरयेक गेल्ल्याच्यो वा शेणिल्ल्याचे गुन्यांव नोंद जाल्यात. ह्या फोनांतले फकत 209 फोन पुलिसांक परतून मेळोवपाक येस आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
