भांगरभूंय | प्रतिनिधी
तीन वर्सात गोशाळांनी 2 हजार परस चड गोरवांक मरण
भांगरभूंय । प्रतिनिधी
पणजी : फाटल्या तीन वर्सांत गोंयांत आशिल्ले गोशाळेंत 2 हजारां परस चड गोरवांक मरण आयलां. म्हयन्याक सरासरी सुमार 80 गोरवांक गोशाळेंत मरण आयलां आनी फाटल्या तीन वर्सांत गोरवां मरपाचो आंकडो तिपेटीन वाडला. मजगतीं, ह्यो गोशाळा चलोवपा खातीर ह्याच काळांत सरकारान 63 कोटी रुपयांचो निधी दिला, अशी म्हायती पशू संवर्धन मंत्री नीळंकठ हळर्णकर हांणी विधानसभेंत लेखी जापेंत दिल्या.
गोंयांत नोंदणीकृत 8 गोशाळा आसात. ह्या गोशाळांनी 6213 गोरवां आलाशिरो घेतात. ह्या गोशाळांनी 2022-23 ते 2024-25 मजगतीं 2,814 गोरवांक मरण आयलां. ह्या मरणां फाटल्यान नेमकें कारण कितें हें पशू संवर्धन खात्यान स्पश्ट करूंक ना. गोरूं मरण पावतकत थळावो अधिकारी तें मेला काय ना हें निश्चीत करता. पूण गोशाळा येवजणे खाला मरण पाविल्ल्या गोरवांचो पोस्टमोर्टम करप शक्य ना.
सगल्यांत चड गोरवां मरपाचो आंकडो मयें दिवचलच्या गोमंतक गोसेवक महासंघ गोशाळेंत नोंद जाला. हे गोशाळेंत 4435 गोरवां आसात आनी 1709 गोरवां मरण पावल्यांत. दुसरी चड मरणां जांबावलेच्या ध्यान फांवडेशनांत नोंद जाल्यात. हे गोशाळेंत 914 गोरवां आसात आनी 904 गोरवांक मरण आयलां. वाळपयचे अखील विश्व जय श्रीराम गोवर्धन केंद्रांत 435 गोरवां आसात आनी 102 गोरवांक मरण आयलां, सावयवेरें लीव्ही सीनर्जी गोशाळेंत 11 गोरवां आसात आनी 16 गोरवां मरण पावल्यात, शिवोले वेल्फेर फोर अॅनिमल्स इन गोवा गोशाळेंत 50 गोरवां आसात आनी 5 गोरवां मरण पावल्यात, सांकवाळच्या शंखावली तिर्थक्षेत्र गोशाळा ट्रस्टांत 7 गोरवां आसात आनी एकाय गोरवाचें मरण नोंद जावंक ना. काणकोणचे कामधेनू गोरक्षा संस्थेंत 209 गोरवां आसात आनी 18 गोरवां मरण पावल्यात, दाभाळ फोंडेंच्या ऑर्गनायझेशन फॉर पिपल अॅण्ड अॅनिमल वॅल्फेर गोशाळेंत 152 गोरवां आसात आनी 59 गोरवां मरण आयलां. मजगतीं 2022-23 ते 2024-25 ह्या काळांत सरकारा कडल्यान 63 कोटी परस चड निधी ह्या आठूय गोशाळेंक आयला. 2022-23 त 14.38 कोटी, 2023-24 त 26.65 कोटी आनी 2024-25 त 21.98 कोटी रुपयांचो निधी आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
