भांगरभूंय | प्रतिनिधी
तवडकार : आदिवासीं खातीर 1996 सावन वावर सुरू केल्ल्याचें म्हणणें
भांगरभूंय । प्रतिनिधी
मडगांव : हांवें आदिवासी समाजा खातीर 1996 वर्सां सावन समाजीक वावर सुरू केला. गोविंद गावडे हांकां हांव 2008 वर्सां सावन वळखता. ताचे आदीं हांवें लोकोत्सव, आदर्श संघ, बलराम शिक्षण संस्था सुरू केल्ली आनी आमदारूय जाल्लो. मागीर गोविंद गावडे देवचार जावन म्हाका वाट दाखयताले काय? अशें म्हणून मंत्री रमेश तवडकार हांणी आमदार गोविंद गावडे हांचेर टिका केली. सरकारांतले मंत्री आनी आमदार हांचे मदल्या ह्या वादाक लागून पक्षांत ‘सगलें बरें’ आसा काय? असो प्रस्न उप्रासला.
मडगांवां पत्रकार परिशद घेवन मंत्री तवडकार हांणी आमदार गावडे हांचेर टिका केली. तशेंच तांचे विशीं केल्लीं विधानां चुकीचीं आसात आनी गावडे हांणी ताचेर स्पश्टीकरण दिवचें, अशें तांणी सांगलें. दोन दिसां आदीं आमदार गावडे हांणी आपल्या संबंदीत कांय पोरणे प्रस्न मांडले, अशें तवडकार हांणी सांगलें. रमेश तवडकार आपूण दाखयल्लो मार्ग आपणायता अशें विधान गावडे हांणी केल्लें. पूण आदर्श संघाची थापणूक 1995 वर्सा जाली. तेन्ना सावन समाजीक वावर चालू आसा. ते उपरांत 13 वर्सांनी गावडे म्हाका मेळ्ळो. मागीर गावडे हांणी देवचाराच्या रुपांत येवन म्हाका वाट दाखयली काय? असो प्रस्न तवडकार हांणी केलो. लोकोत्सवाची संकल्पनाय म्हजीच. बलराम शिक्षण संस्थाय हांवेंच सुरू केली अशें गावडे हांणी सांगलें. पूण आमी लोकोत्सव 2000 वर्सा सुरू केल्लो. फाटल्या 25 वर्सां सावन हो उत्सव चालू आसा. तर गावडे हांणी ही संकल्पना कशी दिली? हे संस्थेचीं आठ आस्थापनां आसात आनी 2007 वर्सा ही संस्था सुरू जाली तेन्ना गावडे हांणी देवचार जावन ह्यो कल्पना दिल्ल्यो काय? अशेंय प्रस्न तवडकार हांणी उपस्थीत केले.
‘पक्षान सांगल्यार मंत्री पद सोडपाक तयार’
फुडल्या काळांत पालिका आनी जिल्लो पंचायत वेंचणुके खातीर आचारसंहिता आसतली, देखून काम करपाक म्हाका उणो वेळ मेळटलो देखून मंत्रीपद नाका अशी म्हजी भुमिका आशिल्ली. मंत्रीमंडळांत रमेश तवडकार सारकिल्या मनशाची गरज आसा अशें पक्षाक दिसलें, ताका लागून म्हाका मंत्रीपद मेळ्ळें. पक्षाच्या आदेशाक लागून मंत्रीपद घेवचें पडलें. पक्षान सांगल्यार हांव मंत्रीपद सोडपाक तयार आसा अशेंय तवडकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
