भांगरभूंय | प्रतिनिधी
नवो मंत्री, शपथविधी विशीं आजूनय निर्णय ना
पणजी : गोविंद गावडे हांकां मंत्रिमंडळांतल्यान काडपाचो निर्णय हो पुरायपणान म्हजो आसा, अशी प्रतिक्रीया मुख्यमंत्री डॉ. प्रमोद सावंत हांणी उक्तायली. नव्या मंत्र्याची नियुक्ती वा शपथविधी विशीं आजूनय निर्णय जावंक ना, अशेंय मुख्यमंत्र्यान म्हणलें.
एके कार्यावळींत आदिवासी कल्याण खात्याच्या कामाचेर टिका करपी गोविंद गावडे हांकां मंत्रिमंडळांतल्यान डिच्चू दिली. बुधवारा सांजेवेळार मुख्यमंत्र्यांच्या शिफारसी उपरांत राज्यपालांनी गोविंद गावडे हांकां मंत्रिमंडळांतल्यान काडपाचो निर्णय घेतलो.
मुख्यमंत्र्यांकडेन आशिल्ल्या आदिवासी कल्याण खात्याच्या कामाचेर टिका केले उपरांत गोविंद गावडे हांचें मंत्रिपद वचप अपेक्षीत आशिल्लें. तांचें मंत्रिपद केन्ना वतलें?, हाची चर्चा बरेच दीस जाले सुरू आल्लिी. निमाणे कडेन बुधवारा सांजेवेळार हो निर्णय जालो आनी राजकीय मळार बोवाळ निर्माण जालो. नवो मंत्री कोण आसतलो? आनी ताची सोपूत विधी केन्ना जातली? हे विशीं जनते मदीं बरीच उत्सुकताय आसा. नव्या मंत्र्याचो मंत्रिमंडळांत आसपाव करप आनी एखाद्याक मंत्रिमंडळांतल्यान काडून उडोवप हो सर्वस्वी मुख्यमंत्र्यांचो अधिकार आसा. हाका लागून आयज हे विशीं पत्रकारांनी विचारलें तेन्ना नवीन मंत्री आनी सोपूत विधी विशीं आजूनय निर्णय जावंक नाशिल्ल्याची जाप मुख्यमंत्र्यांनी दिली.
गोविंद गावडे हांकां मंत्रिमंडळांतल्यान काडून उडोवपा वांगडाच मंत्रिमंडळ फेरबदलाचीय चर्चा बरेच दीस जाली सुरू आसा. गोविंद गावडें सयत तीन मंत्र्यांक काडून तीन आमदारांचो आसपाव जातलो अशी चर्चा बर्याच दिसां सावन सुरू आसा. हे विशीं विचारलें तेन्ना, सध्या तरी अशें कांयच ना, अशें मुख्यमंत्र्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
