भांगरभूंय | प्रतिनिधी
मुख्यमंत्र्यांचें कारवायेचें संकेतपणजीः कला अकादमी सयत हेर कांय विशयांचेर फाटल्या कांय वर्सांत परत परत वादांत पडपी मंत्री गोविंद गावडे हांणी आयतारा फोंड्यां केल्ल्या विधानांक लागून अडचणींत सांपडल्यात. मुख्यमंत्री डॉ. प्रमोद सावंत आनी प्रदेशाध्यक्ष दामू नायक हांणी सोमारा पत्रकारां कडेन उलयतना स्पश्ट केलें, गावडे हांच्या विधानाची दखल घेतल्या आनी तांचेर बेगिनूच कारवाय जातली. देखून कला अकादमी प्रकरणांत कलाकारां कडल्यान ‘सुपारी’ घेवपाक न्हयकार दिल्ल्या मंत्री गावडे हांकां रोखडोच मुख्यमंत्र्या कडल्यान ‘नाल्ल’ मेळटलो.
‘उटा’ आनी आदिवासी कल्याण खात्या वतीन आयतारा फोंड्यां जाल्ल्या ‘प्रेरणा दीस’ कार्यावळींत मंत्री गोविंद गावडे हांणी आपल्याच सरकाराचेर टिका केली. मुख्यमंत्र्यां कडेन अाशिल्ल्या आदिवासी कल्याण खात्याचें प्रशासन डळडळींत जालां अशें सांगून पणजेंतल्या ‘श्रमशक्ती भवना’ खाला कंत्राटदारां कडल्यान कितें तरी घेतले उपरांतच तांचीं फायल खात्यांत हस्तांतरीत करतात असोय दावो तांणी केला. हाचे भायर ताणें प्रलंबीत मागण्याे आनी आदिवासी भवनाचेरूय टिका केल्या.
ह्या विधानां उपरांत सत्ताधारी पक्षान मंत्री गावडे हांचेर टिका, जाल्यार विरोधकांनी सरकाराचेर टिका करपाक सुरवात केल्या. सरकाराचो भाग आशिल्ल्या मंत्री गोविंद गावडे हांणी आदिवासी कल्याण खात्या संबंदीं बेजबाबदार विधानां केल्यांत. अशीं फटीचीं विधानां करचे पयलीं तांणी मुख्यमंत्री डॉ. प्रमोद सावंत हांचे कडेन मंत्री गावडे हांणी संपर्क करपाक जाय आशिल्लो अशेंय सभापती रमेश तवडकार हांणी स्पश्ट केलें. अापूण मंत्री आसतना आदिवासी कल्याण खात्याची रचणूक तयार करून येवजण्यो चालीक लायल्यो. गोविंद गावडे मंत्री आसतना खात्याच्या वावरांत कितें योगदान दिलें तें म्हाका खबर ना असोय उल्लेख तांणी केला.
——————-
गोविंद गावडे हांणी कितें म्हणलें?
– आदिवासी कल्याण खात्याचें प्रशासन डळमळींत जाला. कर्मचाऱ्यांनी तांकां दिल्लें काम करचें. पणजेंतल्या ‘श्रमशक्ती भवन’ खाला कंत्राटदारां कडल्यान कितें तरी घेतले उपरांतच तांचीं फायल खात्यांत हस्तांतरीत जाता हें दुर्दैवी.
– आदिवासींच्या कल्याणा खातीर सरकारान आदिवासी कल्याण विभाग सुरू केलो. पूण खरेंच तो खातें आदिवासींचें कल्याण करता काय ना हो संशोधनाचो विशय.
– आतां मेरेन आमी सगळेंच चौकटी भितर काम केलां. अन्यायाक लागून पिडेस्त आदिवासी भावांक न्याय मेळचो म्हणून कायदे बदलचे. ‘आदिवासी भवन’ची मागणी पोरणी आसा. हे बाबतींत प्रशासना कडल्यान फावो तो फालोअप ना. आदिवासी भवन केन्ना पुराय जातले तें निदान मुख्यमंत्र्यांनी जाहीर करचें.
– दर वर्सा 25 मे दिसा ‘प्रेरणा दीस’ कार्यावळ जाता. सरकार ही कार्यावळ गंभीर्यान घेना जाल्यार ही कार्यावळ करपाक आमी तयार आसात. ही कार्यावळ सुटसुटींत आनी नियोजीत पद्दतीन करची हाची जाणविकाय अधिकाऱ्यांक आसूंक जाय.
– आदिवासी भावांनी संघर्शांतल्यान जायत्यो गजाली साध्य केल्यात. सरकारान वेळ मर्यादा थारावन आदिवासी समाजाच्यो प्रलंबीत मागण्यो चालीक लावच्यो. नाजाल्यार परतून निशेध करपा बगर आमकां पर्याय उरचो ना.
……………………………
कोट
जबाबदार मंत्र्यांनी जबाबदारीन विधानां करचीं. मंत्री गोविंद गावडे हांणी केल्ल्या विधानाची दखल घेतल्या. तांचेर बेगिनूय योग्य कारवाय जातली. – डॉ. प्रमोद सावंत, मुख्यमंत्री
————–
भाजपांत शिस्त म्हत्वाची. हाचे पयलींय मंत्री गोविंद गावडे हांकां शिटकावणी दिल्या. सध्या ते गोंया भायर आसात, आमी तांकां 30 मेक फोन केला, तांचेर आमी निश्चीत कारवाय करतले.
– दामू नायक, प्रदेशाध्यक्ष
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
