भांगरभूंय | प्रतिनिधी
पणजी: पक्षशिस्ती मुखार कोणूच व्हड ना, हें पक्षान हाचे पयलीं दाखोवन दिलां. गोविंद गावडे हे पक्षाचे आमदार आसात. तांचे कडेन चर्चा करून पक्ष योग्य ती कारवाय करतलो अशें भारतीय जनता पक्षाचे म्हणयारे आमदार कृष्णा साळकार हांणी स्पश्ट केलें.
मंत्रीपदा वेल्यान काडले उपरांत आमदार गोविंद गावडे हांणी आयतारा प्रियोळ मतदारसंघात सभा घेतली. हे सभेंत तांणी प्रदेश अध्यक्ष दामू नायक हांचेर आरोप केले. पदाचो वालोर खबर नासतना उखल्ली जीब लायली ताळ्याक…. अशें उलोवप करतल्यांचेर कारवाय कोण करतलो? असो प्रस्न गोविंद गावडे हांणी जाहीर सभेंत केलो. डॉ. प्रमोद सावंत हांकां मुख्यमंत्री करपा सयत भाजपाक सत्तेर हाडपाक म्हजो वांटो आसा. चवकशी करिनासतनाच मंत्रीपद काडलें असो आरोप गावडे हांणी केल्लो.
गोविंद गावडे हांच्या आरोपांचेर मुख्यमंत्री डॉ. प्रमोद सावंत तशेंच प्रदेश अध्यक्ष दामू नायक हांणी कसलीच प्रतिक्रिया उक्तावंक ना. पक्षाचे म्हणयारे आमदार कृष्णा साळकार, आदले आमदार सिद्धार्थ कुंकळ्येंकार, सर्वानंद भगत आनी जिल्हाे पंचायत वांगडी गिरीश उस्कयकार पत्रकार परिशदेक हाजीर आशिल्ले.
भारतीय जनता पक्ष हो संवसारांतलो सगल्यांत व्हड पक्ष आसा. आमदार, मंत्री तशेंच वांगड्यांनी शिस्त पाळपाक जाय. आरोप केले उपरांत गोविंद गावडे हांचे मंत्रीपद काडलें. तांची बाजू आयकून आनी आरोपांची चवकशी करून पक्ष फुडली कारवाय करतलो. चवकशेचे पयलीं कारवाय जावची ना अशें पत्रकार परिशदेंत भाजपान स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
