भांगरभूंय | प्रतिनिधी
दामू नायक हांची परतून जाप
पक्षाच्या धोरणाक धरून प्रक्रिया
‘उखल्ली जीब लायली ताळ्याक’ प्रकरण
भांगरभूंय । प्रतिनिधी
पणजी : भाजपाच्या प्रदेशाध्यक्षाक ‘उखल्ली जीब लायली ताळ्याक’ अशें म्हणून तांचेर शिस्तभंगाची कारवाय कोण करतलो, अशें प्रियोळचे आमदार गोविंद गावडे हांणी जाहीर सभेंत विचारले उपरांत शेनवारा दामू नायक हांणी तांकां परतून जाप दिली. गोविंद गावडे हांचे विशीं पक्षाच्या धोरणाक धरून प्रक्रिया केल्ली. ताका लागून ते ‘सुरय फटास मारतात’ अशें दामू नायक हांणी सांगलें.
शेनवारा 28 जूनाक दामू नायक हांणी पक्षाच्या कामा खातीर मुख्यमंत्री डॉ. प्रमोद सावंत हांची भेट घेतले उपरांत प्रसार माध्यमां कडेन उलयतना तांणी गावडे हांणी केल्ल्या आरोपांक ‘गावडे राजकारण करता’, अशें सांगून तांचे आरोप भायर मारले.
गावडे धडधडीत फट उलयता. ढवळीकार हांचे विशीं उलयल्ले तेन्नाय हांवेंच तांकां पणजी कार्यालयांत आपोवन समज दिल्ली. मुख्यमंत्र्यांच्या खात्याचेर जेन्ना गावडे हांणी आरोप केले तेन्ना दुसऱ्या दिसा म्हाका दिल्लींतल्यान पक्ष फुडाऱ्यांचे फोन आयले. ते उपरांत हांवें गावडे हांणी केल्ल्या आरोपांचो व्हिडियो पळयलो. ते भायर मुख्यमंत्र्यां सयत पक्षांच्या कांय पदाधिकाऱ्यां कडेन चर्चा केली. ते उपरांतूच हांवें विधान केलें. 2 जूनाक हांवें तांचे कडेन हे संबंदांत सविस्तर चर्चा केली. ते उपरांतूच तांचेर कारवाय जाली. ताका लागून गोविंद गावडे जे उलयता, तें निखालस फट आसा, अशें दामू नायक हांणी सांगलें.
पक्षाचे फास्केंत रावुनूच गावडे हांणी केल्ल्या आरोपां संबंदांत हांवें प्रक्रिया केली. गावडे हांणी केल्ल्या आरोपां परांत हांवें पत्रकारां कडेन उलयतना गोविंद गावडे हांचे कडेन चर्चा करतलों, अशेंय सांगिल्लें. त्या वेळार गावडे हांकां उद्देशून ‘उखल्ली जीब लायली ताळ्याक’ अशें करप योग्य न्हय अशें म्हणिल्लें. तांचे संबंदांत पक्षान आपले पद्दतीनूच गरजेची ती प्रक्रिया केली. तांकां मंत्रीमंडळांतल्यान काडपाचो निर्णय मुख्यमंत्र्यांचो आसता, पूण तांचेर कारवाये खातीर पक्षा भितर चवकशी करपाची प्रक्रिया पक्ष करता, पक्षान तेंच केलां, हें गावडे हांणी समजून घेवचें, अशें दामू नायक हांणी स्पश्ट केलें. गावडे हांणी एकदां दिल्लींत पक्ष फुडाऱ्यांक दिवपा खातीर म्हाका पत्र दिल्लें. ते हांवें दिल्ली पावयलें. दिल्लींतल्यान तांकां केन्नाय आपोव शकतात. म्हजें काम हें पक्षाच्या ध्येय धोरणा धरूनूच आसा, अशें दामू नायक हांणी सांगलें.
गावडे उलयता ताका अर्थ ना : दामू नायक
राजकारण करपाक जाय म्हूण गावडे हांणी तें करचें न्हय. ताका अर्थ आसपाक जाय. हांव गोविंद गावडे हांकां मेळिल्ल्याच्यो तारखो, वेळ लेगीत सांगपाक शकता. ताका लागून गावडे जें कितें म्हणटां, ताका कसलोच अर्थ ना, अशें दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
