भांगरभूंय | प्रतिनिधी
कला अकादमी कला आनी संस्कृतीच्या सविचा कडेन
भांगरभूंय । प्रतिनिधी
पणजी : सरकारी आदेशा प्रमाण कला आनी संस्कृती खात्याचे मंत्री म्हूण गोविंद गावडे हांचे कडेन कला अकादमीचें अध्यक्षपद दिल्लें. गावडे हांचें मंत्रीपद गेल्ल्यान तांचें कला अकादमीचें अध्यक्षपद लेगीत आपसूक गेलां, अशें मुख्यमंत्री डॉ. प्रमोद सावंत हांणी पत्रकारां कडेन उलयतना स्पश्ट केलें. मजगतीं, कला आनी संस्कृती खात्याच्या नेमा प्रमाण, कार्यकारी समिती अस्तित्वांत नासतना आनी अध्यक्ष नासतना कला अकादमीचो कारभार खात्याच्या सचिवा कडेन येता. ते प्रमाण हो कारभार आतां खात्याचे सचीव सुनील आंचिपाका हांचे कडेन आयिल्ल्यान जमा आसा. फर्मागुडींतले प्रेरणा दीस कार्यावळींत उलयतना मुख्यमंत्री डॉ. प्रमोद सावंत हांचे कडेन आशिल्ल्या आदिवासी कल्याण खात्याच्या कारभाराचेर टिका करपी गोविंद गावडे हांकां मुख्यमंत्री डॉ. सावंत हांणी मंत्रीमंडळांतल्यान काडलो. फाटल्या कांय वर्सां सावन गाजपी कला अकादमीचें अध्यक्षपद लेगीत गावडे हांचे कडेनूच आशिल्ल्यान सरकारान तांचें हें पद कायम दवरला काय कितें, हे विशीं राजकी मळार चर्चा आशिल्ली. पूण सरकारी नेमा प्रमाण कला अकादमीचें अध्यक्षपद हें कला आनी संस्कृती मंत्र्यां कडेन आसता. ते प्रमाण हें पद गावडे हांकां दिल्लें. तांचें मंत्रीपद गेले उपरांत तांचे कडलें अध्यक्षपद लेगीत आपसूक गेलां, अशें मुख्यमंत्री डॉ. सावंक हांणी स्पश्ट केलें. दोन म्हयन्यां आदीं कला अकादमीचे कार्यकारी समितीचो कार्यकाळ सोंपिल्लो. ते उपरांत गावडे हे प्रभारी अध्यक्ष ह्या नात्यान काम पळयताले. आतां गावडे हांकां मंत्रीपदा वयल्यान काडले उपरांत तांचे कडलें कला अकादमीचें अध्यक्षपद काडून घेतलां काय ना, हे विशींचो आदेश जारी जावंक ना. पूण अशे स्थितींत कला अकादमीचो ताबो कला आनी संस्कृती खात्याच्या सचिवा कडेन येता, अशेंय सुत्रांनी म्हणलां.
‘उटा’चें मौन
गोविंद गावडे हांचें मंत्रीपद वचपाची शक्यताय निर्माण जले उपरांत तांच्या बचावा खातीर मैदानांत देंविल्ले ‘उटा’ संघटणेन गावडे हांकां मंत्रीपदा वयल्यान काडले उपरांत मौन बाळगिलां. हे संबंदांत ‘उटा’चे अध्यक्ष प्रकाश वेळीप हांचे कडेन संपर्क केलो, तेन्ना तांणी सांगलें, समाज भावांक न्याय आनी तांचे हक्क मेळोवन दिवचे खातीर ‘उटा’ सदांच सक्रीय आसतली. पूण गावडे हांच्या विशयाचेर उलोवपाचें तांणी टाळ्ळे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
