भांगरभूंय | प्रतिनिधी
भारतमातेचे मांडयेर वशिल्लें आमचें गोंय माणकुलें खरें, पूण वेगळ्या वेगळ्या कलाकारांनी, वेवसायांनी, संस्कृतायेन आनी अध्यात्मीकतायेन भरलां. गोंय जरी दिसपाक ल्हान आसलें तरी ताणें अनेक कलाकारांक, व्यक्तीमत्वांक जल्माक घालां. आमच्या गोंयाक लोक आयज खूब वायट नदरेन पळयता अशें म्हणपाक कमी दिसचें ना. गोंय म्हणटाच तांच्या लक्षांत येता ते म्हणल्यार दर्या, पार्ट्यो आनी सोरो आनी फक्त एक मनरिजवणेचें साधन. दर्या, न्हंयो ह्यो आसात खऱ्यो, पूण तांचो नेमको वापर कसलो काय? दर्या हो फक्त नागड्या उगड्या लोकां खातीर न्हय तर वेळेर बसून साधना-तप करपाचें स्थान, हें खूबश्या लोकांक आयज कळना. गोंयची खरी वळख ही “गाय” ह्या उतरा वेल्यान आयल्या. जे भुंयेर जंय गायचें रक्षण जाता तिचें संरक्षण जाता अशी ही भूंय म्हणल्यार आमची गो भुमी, योग भुमी, तपोभुमी. गोंयांत फक्त मौज-मजा करप हें आसात, पूण सगल्यांत म्हत्वाचें म्हणल्यार आमच्या गोंयाक अध्यात्मीकतेची जोड आसा.
सद्गुरु ब्रह्मेशानंदाचार्य स्वामिजींच्या अनेक प्रयत्नांत आयज आमच्या गोंयची खरी वळख संवसारा मुखार उजवाडाक येता. अध्यात्म, संस्कृती आनी संस्कार हांचो त्रिवेणी संगम आशिल्ली गोमंतक भुमी जगा फुडल्यान हाडपाच्या उद्देशान “गोवा स्पिरिट्युयल फेस्टिव्हल” आयोजीत केला. गोंयची समृद्ध सांस्कृतीक परंपरा, सनातन अध्यात्मीक दायज आनी गोंयचें अस्मितायेचें संवसारीक दर्शन घडोवपी महोत्सव म्हळ्यार “गोवा स्पिरिट्युयल फेस्टिव्हल”.
हो पुराय पर्व नारिशक्तीच्या फुडारपणा खाला घडोवन हाडटले. हो महोत्सव फक्त गोंयकारांकूच न्हय तर विश्वभरच्या लोकांक गोंयचे विशी अधिकृत म्हायती तशेंच गोंयचे अस्मिताये विशीं सकारात्मक विचारांची एक ज्योत थारतली. ह्या इतिहासीक महोत्सवाक खूबश्या संतांचें सान्निध्य लागतलें, महामंडलेश्वर, संत, अध्यात्मीक गुरु, जगद्गुरु शंकराचार्य, विवीध पिठांचे पिठाधीश्वर, आखाड्यांचे संत-महंत हाजीर आसतले. परम पुज्य सद्गुरु ब्रह्मेशानंदाचार्य स्वामिजीचों देव, देश आनी धर्म ह्या सपनाचे दिकेन एक पावल म्हणल्यार “गोवा स्पिरिट्युयल फेस्टिव्हल”. ह्या महोत्सवाचो उक्तावण सुवाळो 19 फेब्रुवारी दिसा सांजे 4.30 वरांचेर संगमपूर हांगा जातलो. तशेंच संगमपूर शिव साम्राज्य समितीच्या आयोजना खाला छत्रपती शिवाजी महाराजांच्या भव्य मुर्तीचें लोकार्पण जातलें.
20 फेब्रुवारीक सांजे 4 वरांचेर पणजे ‘गोवा व्हिजन समीट’ खाला पुरस्कार भेटवण सुवाळो आनी परिसंवाद जातलो. 21 फेब्रुवारीक फांतोडेर 6.30 वरांचेर कळंगूट दर्यादेगेर संतपुजन, योगसाधना, श्रीहनुमान चालीसा पठण, “रन फॉर स्पिरिच्युअॅलिटी” मॅरेथॉन तशेंच संत सान्निध्यात पवित्र समुद्रस्नान जातलें. 22 फेब्रुवारीक सांजे 4 वरांचेर भव्य समुद्र महाआरती, रथयात्रा, सामुदायीक श्रीमद्भगवद्गीता पठण, संतपुजन, संतांचे आशिर्वचन, आनी गोंयच्या कलाकरांचो आवाज संगीत प्रस्तुती गजर गोमंतक ही भव्य अशी कार्यावळ जातली. 23 फेब्रुवारीक सांजे 4 वरांचेर पणजी हांगा स्पिरिच्युयल क्रुझ वरवीं म्हादय न्हंयेचें पुजन, सत्कार सुवाळो आनी संत सान्निध्यांत नौका विहाराचें आयोजन जातलें.
24 फेब्रुवारीक सकाळीं 10.30 वरांचेर श्री श्रेत्र तपोभूमी कुंडय गौमाता पुजन, देवस्थान आनी संत संमेलन, सद्गुरु भक्ती महायज्ञ आनी दिव्य ब्रह्मानुश्ठान सुवाळ्यांत ह्या गोंय अध्यात्मीक महोत्सावची सांगता जातली. अशा ह्या स दिसांच्या कळांत गोंयचें खरें रूप जगा मुखार येतलें हें ठळकपणान जाणवता.
गोंयची खरी वळख ही गोंयची संस्कृती, गोंयचें अध्यात्मीक दायज आमची गाय आमचो समुद्र नारायण हें सिद्ध करपाचो एक यत्न म्हणल्यार “गोंय अध्यात्यमीक महोत्सव 2026”. सगल्यांनी ह्या महोत्सवाक भक्तीभावान व्हड संख्येन आनी मुजरत येवचें!! जय सच्चिदानंद !!
स्वेद सदानंद दिवकार
70208 54216
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
