भांगरभूंय | प्रतिनिधी
वास्को: गोवा शिपयार्डा लागसारा एका नुस्तेंमाराची कूड दर्यादेगेर व्हावून आयली. मरण आयिल्ल्याचें नांव एफ्रेम टोप्नो अशें आसा, तो वास्कोच्या खारेवाडा हांगा रावतालो. मुळचो झारखंडचो आशिल्लो.
वास्को पुलिसांच्या म्हणण्या प्रमाण, शिपयार्ड लागसारा दर्यांत उफेवपी एका मनशाचे कुडी विशीं अनवळखी फोनावेल्यान फोन आयले उपरांत ही घडणूक मुखार आयली. घडणुके सुवातेर पावले उपरांत अधिकार्यांनी कूड दर्यादेगेर व्हावून आयिल्ल्याची पुश्टी केली.
मुळावे चवकशेंत अशें दिसून आयलें, टोप्नो हो वास्को-बायणाचो. ओस्विन जो बॅरेटो हांच्या नुस्तेंमारी ट्रॉलराचेर कामगार म्हणून काम करतालो. पुलिसांनी सांगलें, हो मनीस नुस्तेंमारी खातीर खोल उदकांत असतान चुकून दर्यांत पडलो. घडणुके सुवातेर पंचनामो केलो आनी कूड वैजकी-कायदेशीर औपचारिकते खातीर मडगांवच्या जिल्लो हॉस्पिटलांत धाडली. वास्को पुलिसांनी ह्या प्रकरणाची भारतीय न्याय संहितेच्या कलम १९४ खाला असैमीक मरण म्हणून नोंद केल्या.
फुडलो तपास मुरगांव उप आधीक्षक गुरुदास कदम हांच्या मार्गदर्शना खाला आनी निरीक्षक कपिल नायक हांचे देखरेखी खाला पुलीस उपनिरीक्षक प्रिस्ली कार्व्हालो करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
