भांगरभूंय | प्रतिनिधी
पोरणें गोंय : गांवांत रस्ताद सुण्यांचो आंकडो दिसान दीस वाडत आसा, ताका लागून नागरिकांक धोको निर्माण जाला. रस्ताद सुण्यांचो आंकडो नियंत्रणांत हाडपा खातीर तांकां निर्बिजीकरण करप गरजेचें अशें एका गांवकारान ग्रामसभेंत सांगलें. हे मागणेचेर सरपंच आग्नेलो फर्नांडीस हांणी ही गजाल बेगीन संबंदीत अधिकार्यां कडेन व्हरपाचें आश्वासन दिलें.
गोवा वेल्हा आयज आयतारा ग्रामसभा जाली. ग्रामसभेंत वेगवेगळ्या विशयांचेर चर्चा जाली. तातूंत रस्ताद सुण्यांचें निर्बिजीकरण, उदक भरपाचो प्रस्न, कोयर वेवस्थापन आनी रस्त्याचे काम हांचेर चर्चा जाली.
मजगतीं कांय नागरीक भौशीक सुवातांचेर रस्ताद सुण्यांक खावपाक घालतात. हाका लागून धोका निर्माण जाल्ल्याचें कांय जाणांनी नदरेक हाडलें. हे फाटभुंयेर, रस्ताद सुण्यांक जेवण दिवपाचें आसल्यार पंचायत अधिकार्यांच्या सल्ल्या प्रमाण आनी थारायिल्ले सुवातेर तें दिवप सक्तीचें आसतलें अशें पंच आयनो डिसोझा हांणी स्पश्ट केलें. हे नेम मोडपी कोणूय मेळ्ळार ते विशीं पंचायतीक कळोवचें अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
