भांगरभूंय | प्रतिनिधी
साबार सर्ती, कार्यावळींचें आयोजन; आयोजकांनी दिली म्हायती
भांगरभूंय । प्रतिनिधी
दिवचलः कोंकणी भाशा मंडळ गोंय, युवा जैतिवंत दिवचल आनी झांट्ये म्हाविद्यालय हांच्या जोडपालवान 26 वो गोवा युवा महोत्सव 25 आनी 26 जानेवारीक दिवचलच्या नारायण झांट्ये वाणिज्य म्हाविद्यालयाच्या मैदानाचेर आयोजीत केला. युवा महोत्सवाची तयारी नेटान चालू आसा, अशी म्हायती आयोजन समितीचे येवकार अध्यक्ष डॉ. चंद्रकांत शेट्ये, डॉ. शेखर साळकार, कोंकणी भाशा मंडळाची अध्यक्ष रत्नमाला दिवकार, गजानन बांबोळकार, वैभव कळंगूटकार, तन्वी पळ, मानसी पावसकार हांणी पत्रकार परिशदेंत दिली.
ह्या युवा महोत्सवांत शिक्षणीक संस्था आनी विवीध गटां खातीर विवीध कार्यावळी आयोजीत केल्यात. तातूंत युवा महोत्सवाचे जागृती खातीर भव्य मिरवणुकेचो आस्पाव आसा.
कोंकणी पॉप, लोकमांड, परंपरीक लोकनाच, देशी परंपरीक भेस, प्रस्नमंजुशा, वण्टी पत्रक (फास्की), रंगीत खोमीज डिजिटल आर्ट, गोंयच्या परंपरीक वाद्यांची जुगलबंदी, लोकनाट्य, रस्तो नाट्य, ट्रियो अश्यो साबार सर्ती वेगवेगळ्या माचयांचेर जातल्यो, अशी म्हायती आयोजकांनी दिली.
वांटो घेवपी पंगडांक आकर्शक रोख इनामां, करंडक, तशेंच प्रमाणपत्रां दितले.
25 जानेवारीक सकाळीं 10.30 ते 11.30 वरां मेरेन उक्तावण सुवाळो जातलो. ते उपरांत दोन दीस साबार स्पर्धात्मक कार्यावळी जातल्यो. 26 जानेवारीक सांजे वेळार समारोप सुवालो जातलो. गोंयच्या विवीध शिक्षणीक संस्थांतल्यान व्हड संख्येन उपस्थिती आसची हे खातीर आयोजकां वतीन जागृताय करतात. व्हड संख्येन युवा शक्तीन नोंदणी करची, असो उलो पत्रकार परिशदेंत मारलो.
25 जानेवारीक सकाळीं लोकमांड, लोकनाट्य, आयलें तशेंच गायलें चांचणी फेरी, फास्की, कथा, विवीध खेळ, सांजे वेळार प्रस्नमंजुशा चांचणी फेरी अश्यो कार्यावळी जातल्यो. 26 जानेवारीक सकाळीं 9.30 वरांचेर चांचणी फेरी सुरू जातली. 11 वरांचेर प्रस्नमंजुशा, 11.30 वरांचेर मुलाखती जातल्यो. ते उपरांत फास्केंतली कार्यावळ जातली. पांच वरांचेर महोत्सवाची सांगता जातली. युवा शक्तीक आपले प्रतिभेचें दर्शन घडोवपाची संद ह्या महोत्सवांतल्यान मेळटली. एक वेगळी मेजवानी युवा शक्तीक ह्या महोत्सवांतल्यान मेळटली, अशी म्हायती आमदार डॉ. चंद्रकांत शेट्ये, डॉ. शेखर साळकार तशेंच कोंकणी भाशा मंडळाची अध्यक्ष रत्नमाला दिवकार आनी गजानन बांबोळकार, तन्वी पळ हांणी पत्रकार परिशदेंत दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
