भांगरभूंय | प्रतिनिधी
मडगांवः मडगांवच्या एसजीपीडीए मैदानाचेर आयोजीत केल्ल्या दुसऱ्या गोवा-बेळगांव एक्स्पोचें बिरेस्तारा सांजवेळार उक्तावण जालें. ह्या वेळार भौशीक बांदकाम मंत्री दिगंबर कामत, भाजपाचे प्रदेशाध्यक्ष दामू नायक, मडगांवचे नगराध्यक्ष दामोदर शिरोडकार, एसजीपीडीएचे अध्यक्ष दाजी साळकार, मॉडेल मडगांवचे अध्यक्ष योगीराज कामत, फोमेंतोचे संचालक ज्यो लुईस आनी हेर मानेस्त हाजीर आशिल्ले. एक्स्पोच्या पयल्याच दिसा गिरायकांनी खरेदी करपाक बरीच गर्दी केल्ली.
प्रुडंट मिडिया नेटवर्कान गोंय आनी बेळगांवच्या वेगवेगळ्या नामनेच्या आस्थापनांच्या सहभागान प्रदर्शन आनी विक्री उपक्रम फाटल्या वर्सा सावन सुरू केला. मानेस्तांक ढोलताशांच्या गजरांत येवकार दिलो. प्रुडंट मिडिया नेटवर्कान सेगीत दुसऱ्या वर्सा गोवा-बेळगांव एक्स्पो घडोवन हाडून जायत्या आस्थापनांक एकठांय हाडले. हाका लागून गोंय आनी बेळगांव हांचे मदलो संबंद आजून घट जाला. गोंयचे जायते लोक खरेदी खातीर बेळगांवा वतात. आतां खरेदी करपाक बेळगांवांत वच्चें बदला बेळगांवचीं आस्थापनां गोंयांत हाडल्यात. खाणां-जेवणाच्या पदार्थां सयत वेगवेगळीं वस्तू ह्या गिरायकांक आकर्शीत करतल्यो. ह्या एक्स्पो वरवीं बेळगांवच्या बऱ्या आस्थापनांची गोंयच्या गिरायकांक वळख करून दिल्या.
बेळगांव आनी कोल्हापूरांत खरेदी करपाक वचपी गिरायकांक आतां तीच खरेदी गोंयांत करपाक मेळटली. हो एक्स्पो 1 मार्च मेरेन मडगांवच्या एसजीपीडीए मैदानाचेर आसतलो. दर दिसा सकाळीं 11 ते रातीं 9 मेरेन हें प्रदर्शन आनी विक्री गिरायकां खातीर उक्ती आसतली. नागरिकांक ह्या उपक्रमाचो लाव घेवचो असो उलो आयोजकांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
