भांगरभूंय | प्रतिनिधी
पणजीः गोंयच्या टॅक्सीकारांक गोवा टॅक्सी अॅपाकडेन आकर्शीत करपा खातीर गोंय सरकारान फुकट इंधन दिवपाची येवजण जाहीर केल्या. २५ लिटर मेरेनचें फुकट इंधन दिवपाची घोशणा करीत गोंय सराकारान कांय नेम आनी अटी हे येवजणे खातीर जारी केल्यात.
पर्यटन खात्यान सुरू केल्ल्या गोवा टॅक्सी अॅपाचेर नोंद आशिल्ल्याच टॅक्सीकारांक पेट्रोल, डिजेल आनी सिएनजी हे इंधन २५ लिटर मेरेन फुकट दितलें. तशेंच फकत ५०० टॅक्सी चालक जे अॅपा वरवीं ५० भाडीं मारतले तांकांच हे येवजणेचो लाव मेळटलो. ही ऑफर घेवपा खातीर टॅक्सी चालक सकाळीं ८ ते सांजेचीं ८ वरां मजगतीं तीस दिसां खातीर आपल्या वेवसायांत सक्रीय आसपाक जाय, अशी म्हायती पर्यटन खात्यान दिल्या.
चडशे थळावे टॅक्सीकार अॅप आधारीत टॅक्सी वेवसायाचें तशेंच थळावे टॅक्सी चालक, जे अॅपाचेर पयलींच नोंद आसात तांकां सशक्तिकरण करपा खातीर आनी सेवेंत वाड करपा खातीर ही येवजण जाहीर केल्या.
गोवा टॅक्सी अॅप ओक्टोबर २०२३ वर्सा लॉन्च केल्लो. आतां मेरेन ह्या अॅपावरवीं ७० हजार परस चड पर्यटकांनी टॅक्सी सेवेचो लाव घेतलो. आतां मेरेन १ हजार टॅक्सी हे अॅप सकयल नोंद जाल्यात, अशी म्हायती पर्यटन खात्यान दिली.
ह्या ऍपा वरवीं टॅक्सीचें बुकींग करपा सयत टॅक्सी धनयांक आपले टॅक्सीची नोंदणी करपाक मेळटा. ह्या अॅपा वरवीं टॅक्सी खंय पावल्या आनी गिरायक खंय आसा हाची रिअल टायम म्हायती मेळटा. तशेंच सरकारी अधिसुचीत दरा प्रमाण किलोमिटर प्रमाण भाड्याचें दर, गुगल मॅप, विवीध पेमेंट पर्याय आनी चालक तशेंच गिरायकां खातीर आपतकालीन सेवा ह्या अॅपांत आसा. अदीक म्हायती खातीर १३६४ हे हॅल्पलायनीचेर संपर्क करचो अशी म्हायती पर्यटन अधिकार्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
