भांगरभूंय | प्रतिनिधी
पणजी: गोवा कोंकणी अकादेमी वतीन ३८ वो राजभास दीस आनी कोंकणी साहित्य, भाशा सेवा पुरस्कार भेटवण सुवाळ्याचें आयोजन केलां. हो सुवाळो ४ फेब्रुवारीक सांजेच्या ४ वरांचेर दोनापावलाच्या राजभवनांतल्या दरबार हॉलांत जातलो.
अकादेमीन २०२२, २०२३ आनी २०२४ वर्सा खातीरचें साहित्य आनी भाशा सेवा पुरस्कारांची घोशणा केल्या. मुख्यमंत्री डॉ. प्रमोद सावंत हांचे हस्तुकीं राजभास वर्धापन दीस सुवाळ्यांत ४ फेब्रुवारीक ह्या पुरस्कारांचें वांटप जातलें. ह्या वेळार रमेश घाडी, प्रमोद आचार्य, अतुल पंडीत, सम्राट बोरकार, भूषण भावे, संजय बोरकार, सुरेश काकोडकार, रामानंद रायकार मेळून वट्ट ४८ जाणांक तीन वर्सां खातीर पुरस्कार भेटयतले. ह्या पुरस्काराचें रोख २५ हजार, शाल, भोवमानपत्र अशें स्वरूप आसा. सेवा पुरस्कार ५० हजारांचे आसात.
ह्या सुवाळ्याक सगल्यांची हजेरी भोव मोलाची. कार्यावळीक येतना तुमचें आपोवणें कार्ड आनी वळखपत्र सांगाताक दवरचें. आधार कार्ड आसल्यार बरें. तुमची हाजेरी नोंद करपा खातीर ७७७५८९१८५७ ह्या क्रमांकाचेर संपर्क करचो, असो उलो गोवा कोंकणी अकादेमीन मारला.
सुवाळ्याक वचपाक बसीची वेवस्था
पणजे बस स्टेंडा वयल्यान पुरस्कार सुवाळ्याचे सुवातेर वचपा खातीर अकादेमीन बसीची वेवस्था केल्या. GA 05 T 1461 ह्या नंबराची बस दनपरां ३.१५ वरांचेर पणजे बस स्टॅण्डा वयल्यान (मारुतीच्या देवळा कडल्यान) सुट्टली आनी सुवाळो सोपतगीर परततली. जांकां बस व्यवस्थेचो लाव घेवपाचो आसा तांणी ह्या ७७७५८ ९१८५७, ९१५८३ ७१६९५, ९४२३० ५८३१८ फोन नंबराचेर संपर्क करचो,अशें कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
