भांगरभूंय | प्रतिनिधी
मडगांव : पुणे रेल्वे सुरक्षा दळान अहमदनगर रेल्वे स्टेशनाचेर गोंय एक्स्प्रेस गाडयेंतल्यान जावपी बेकायदेशीर सोर्याचे तस्करीचें प्रकरण उक्तडार हाडलें. गोंयच्यान हो सोरो दिल्लीक विकपाक व्हरतालो. हातूंत हावजकिपींग स्टाफ आनी कोच अटेंडंट हांचोच आशिल्ल्याचें दिसून आयलें. हाका लागून गोंयच्यान जावपी सोर्याचे तस्करीचेर आनीक खर नदर दवरपाची गरज आसा.
पुणे विभागांतल्या रेल्वे सुरक्षा दळान दोन दिसां आदीं अहमदनगर स्टेशनाचेर गोवा एक्सप्रेसींतल्यान सोरो तस्करीचो प्रकार उक्तडार हाडलो. गोवा एक्स्प्रेस (१२७७९) हे गोंयच्यान दिल्लीक वचपी गाडयेंत ही कारवाय केली. हे गाडयेच्या कोच एम१तल्या दोन मनशांचेर दुबाव आशिल्लो. हातूंत एसी कोच अटेंडंट ललीत जयचंद कुमार (२८,रा. मथुरा, उत्तर प्रदेश) आनी हाऊसकीपिंग स्टाफ वांगडी राहुल सुरेंद्र कुमार (३५) हांकां ताब्यांत घेतले. गोंयचो सोरो दिल्लीक चड दरान विकपाच्या हेतान ही येरादारी करताले, अशें चवकशेंतल्यान तांणी स्पश्ट केलें. दुबाविता कडल्यान ११,९७० रुपयांच्यो सोर्याच्यो २६ बाटल्यो जप्त केल्यो. तांकां कारवाये खातीर अहमदनगर उत्पादन शुल्क विभागाकडे दिले.
गोंयच्या वचपी रेल्वे गाडयेंतल्यान सोर्याची तस्करी जाल्ल्याचें ह्या प्रकरणाक लागून परत सिद्ध जालें. गोंयचो सोरो मेळ्ळे उपरांत राज्याचें नांव पेड्ड्यार जाल्ल्यान अशे तरेच्या सोर्याचे तस्करी आड खर उपाय आनी तपासणी मोहीम सुरु करपाची गरज आसा. रेल्वेंत सेवा दिवपी विवीध कर्मचार्यांचीय नेमान तपासणी जावपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
