भांगरभूंय | प्रतिनिधी
गोवा इन्स्टिट्यूट ऑफ मॅनेजमेंट (जीआयएम) विद्यार्थ्यांनी जागतीक पांवड्यार दुसरे खेपे एम 2 फ्लरीश सर्तींत जैत मेळयलां. संवसारभरांतल्या 685 सर्तकांतल्यान ह्या विद्यार्थ्यांक जैतवंत म्हूण वेंचून काडल्यात. दर वर्सा वट्ट 17 जैतिवंत जाहीर करतात, जे संयुक्त राष्ट्र संघटनेन थारायिल्ल्या 17 जागतीक ध्येयां मदल्या दरेका ध्येयाक अनुरूप आसतात आनी तें एम 2 फ्लरिश संकेतथळाक सादर करतात.
हे सर्तींत गोवा इन्स्टिट्यूट ऑफ मॅनेजमेंटांतले वट्ट 4 पंगड देशभरांतल्यान 685 प्रवेशिकांतल्यान निमाण्या फेरये खातीर वेंचून काडले. फाटल्या वर्सा हेच संस्थेच्या दुसऱ्या पंगडान ‘जयपुर रग्स’ ह्या विशयाचेर काम केलें, जी जयपूरांतल्या एका कारागीराच्या उदरनिर्वाहा संबंदीत कथा आसा.
अॅम टू फ्लरिश हो वेस्टर्न रिझर्व्ह युनिव्हर्सिटीच्या वेदरहेड स्कूल ऑफ मॅनेजमेंटांत सेंटर फॉर बिझनेसाचो प्रकल्प. गोवा इन्स्टिट्यूट ऑफ मॅनेजमेंटांतल्या विद्यार्थ्यांनी हे काणयेंत, वेवसायीक नविदाद वळखून एका वेवसायीक फुडाऱ्याची मुलाखत घेतली आनी ती सादर केली. ह्या कथांक युएन सस्टेनेबल डेव्हलपमेंट ग्लोब (एसजीडीएस) मार्गदर्शन करता आनी ताचे उपरांत पुनरावलोकन प्रक्रिया पास जाल्लीं कथा एम 2 फ्लोरिश प्लॅटफॉर्माचेर उजवाडाक येता.
अंदूं, “एव्हरी ड्रॉप काउंट” नांवाच्या जैतिवंत काणयेंत “एब्झोल्यूट वॉटर प्रायव्हेट लिमिटेड” आसा, जी जागतीक ध्येय # 6: निवळ उदक आनी नितळसाण खाला आसा. विद्यार्थी जतीन त्रिपाठी, कुशाग्र बन्सल, आकाश घोष, श्रीकरण शेणवी सुरसुरे आनी अनुष्कर चौहान हे प्रकल्पाचे लेखक आशिल्ले. तांकां जीआयएमचे सामान्य वेवस्थापन आनी अर्थशास्त्र प्राध्यापक दिव्या सिंघल हांणी मार्गदर्शन केलें.
ह्या प्रकल्पाचेर काम करपी एका विद्यार्थ्याक ह्या विशयाचेर विचारलें तेन्ना ताणें सांगलें, ‘एब्झोल्यूट वॉटर ही एक कंपनी जी सामकी वेगळे तरेन काम करता. ती आपल्या उदक वेवस्थापन पद्दतींतल्यान पर्यावरणांत कशें योगदान दितात हाचेर खोलायेन वचप खूब मनोरंजक आशिल्लें. एक विद्यार्थी म्हूण ती खऱ्या अर्थान ज्ञानवर्धक प्रक्रिया आशिल्ली, खास करून प्राध्यापक सिंघल हाच्या मार्गदर्शना खाला. जीआयएम हांणी आमकां ही संद दिल्या म्हूण म्हजो पंगड आनी हांव खऱ्यांनीच खोशी आसा आनी आमची काणी फुडल्या पिळग्यां खातीर वातावरण सुदारपाक योगदान दितली, अशी आस्त बाळगता.”
एम 2 फ्लरीश प्रकाशनां वेवसाय पर्यावरण संरक्षण आनी समाजीक उदरगती कडेन ल्हवू ल्हवू कशे वतात हाचेर भर दिता जी निःसंशयपणान आयची गरज आसा. फ्लोरीश इनामाक लागून विद्यार्थी आनी जीआयएम प्राध्यापक खोशी आसात.” दिव्य सिंघल हांणी व्यक्त केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
