भांगरभूंय | प्रतिनिधी
भांगरभूंय । प्रतिनिधी
पर्वरीः गोवाकॅन (गोवा सिव्हिक आनी कंझ्युमर अॅक्शन नॅटवर्क) आनी येरादारी पुलिसां वतीन बिरेस्तारा पर्वरी अटल सेतू पोंदा साई सर्व्हिसा लागीं रस्तो सुरक्षा जाग्रुताय केली. सीटबेल्ट घालात, हेल्मेट घालात, येरादारी नेमांक पाळो दियात अशी सूचोवणी करपी तकटे घेवन गोवाकॅनाच्या वावुरप्यांनी घोशणा दिवंन वाहनां चलयतल्याचें लक्ष ओडून घेतलें. येरादारी पुलिसांनी तांकां मजत केली.
चडशे दुचाकी चालक अजून आयएसआय मानांकीत हेल्मेटा घालनात, बाकीचे हेल्मेटांचे पट्टे बांदनात.चार चाकी वाहनांतले प्रवासी सीट बेल्ट बांदनांत. हाका लागून अपघात जाल्यार तांका दुखापत जावपाची शक्यताय आसता अशें गोवाकॅनाचो संयोजक रोलंड मार्टिन्स हाणे ह्या वेळार सांगलें. रस्तो सुरक्षे विशीं केल्ले हे जाग्रुतायेक ड्रायव्हरानी आनी दुचाकी चालकांनी बरो प्रतिसाद दिलो.
गोंयत रस्तो अपघातांत दिसपट्टो सरासरी एकल्याक मरण येता. ताका लागून अपघात जावचे न्हय हे खातीर लोकां मदीं रस्तो सुरक्षे खातीर जाग्रुताय करपाची सामकी गरज आसा अशे मार्टिन्सान सांगलें. वाहनांचे हालचालीचेर नियंत्रण दवोरपा खातीर सूचोवणी तकट्यांची मजत जाता. ग्रामपंचायतींनी रस्तो सुरक्षा आनी येरादारी वेवस्थापन समितींची स्थापणूक करून अपघात जावचे न्हय हे खातीर यत्न करपाक जाय अशेंय ताणे सांगलें.
येरादारी सुरळीत जावची हे खातीर रस्त्यांनी सूचोवणी तकटे लागल्यात. काय वाहन चालक ह्या तकट्यां कडेन आडनदर करून अपघातांक आमंत्रण दितात अशें येरादारी पुलीस निरीक्षक सचीन नार्वेकार हांणे जाग्रुती कार्यावळींत उलयतना सांगलें. पुलां वयल्यान सायड मारपाक जायना तशेंच स्पीड लिमीट 40 किमीं आसपाक जाय. पूल चड करून मांडवी पूला वयल्यान वतना वाहन चालक ह्या गजालीं कडेन आडनदर करतात. अपघात जावचे न्हय आनी जीव वाटावचे हे खातीर येरादारी नेमांक पाळो दिवप हे लोकांनी आपली लागणूक समजवपाक जाय अशें. वाहन चालकांनी जापसालकी दाखयल्यान अपघात आपसूक उणे जातले अशें नार्वेकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
