भांगरभूंय | प्रतिनिधी
वॉशिंगटन, खबरां संस्था: ‘‘अमेरिकेंत नव्यान प्रस्तावीत ‘गोल्ड कार्ड’ उपक्रमा खाला अमेरिकी कंपन्यो अमेरिकी विद्यापीठांत भारतीय पदवीधरांक नोकर्यो दिवपाक शकतल्यो.’’ अशें अमेरिकेचे अध्यक्ष डोनाल्ड ट्रम्प हांणी सांगलें.
ट्रम्प हांणी बुधवारा ‘गोल्ड कार्ड’ उपक्रमाचं उक्तावण केलें. ह्या उपक्रमा खाला अमेरिके भायल्या गिरेस्त मनशांक ५० लाख अमेरिकी डॉलर (४३.५७ कोटी रुपया) शुल्क भरून अमेरिकेंत रावपाक आनी काम करपाक मेळटलें. तशेंच, अमेरिकी नागरिकत्वूय मेळीं येता. ट्रम्प हांणी, ‘आम्ही गोल्ड कार्ड विकतले. तुमचेकडेन ग्रीन कार्ड आसा. हेंच आतां गोल्ड कार्ड जावन आसा. आमी त्या कार्डार ताची सुमार ५० लाख अमेरिकी डॉलर अशी किंमत घालतले. ह्या कार्डा वरवीं ग्रीन कार्डचे हक्क मेळटले. तशेंच, नागरिकत्वाकडेन वाटचाल सुरू जातली. गिरेस्त लोक हें कार्ड घेवन देशांत येतले.’
सध्याच्या स्थलांतरां खातीरची वेवस्था आंतरराष्ट्रीय पांवड्यावेल्या बुद्धिवाद्यांक, विशेश म्हळ्यार भारतीयां खातीर आडखळ थारिल्ल्याचें सांगून ट्रम्प हांणी, ‘भारत, जपान, चीन आनी हेर देशांतल्यान येवपी विद्यार्थी हार्वर्ड वा वॉर्टन स्कूल ऑफ फायनान्स हांगा शिकतात. तांकां नोकरेची ऑफर येता. मात, ती रोखडीच रद्द जाता. कारण संबंदीत विद्यार्थी अमेरिकेंत रावतात काय ना हाची शाश्वती नासता. हाका लागून जायत्या हुशार विद्यार्थ्यांक देशाभायर वयचें पडटा. हे विद्यार्थी संबंदीत देशांत वचून बरे उद्देजक जातात. हजारांनी लोकांक रोजगार दितात. हें आडावपा खातीर कंपनी गोल्ड कार्ड घेवन ताचा वापर नोकरी दिवपाक करपाक शकतली.’’ अशा लक्षावधी कार्डाची विक्री जातली, असो अदमास ट्रम्प हांणी उक्तायलो.
ट्रम्प हांच्या धोरणाक लागून अर्थवेवस्थेक धोको!
भारतीय मालाचेर आयातशुल्क दिवपाचे अमेरिकेचे अध्यक्ष डोनाल्ड ट्रम्प हांच्या आग्य्रा विशीं कॉंग्रेस पक्षान बिरेस्तारा चिंता उक्तायली. केंद्रांतल्या मोदी सरकारान ह्या अपमानास्पद वागणुके आड भूमिका घेवपी आनी अमेरिकेचीं धोरणां भारतांत स्वीकारचे अशें ट्रम्प हांकां सांगचें असो उलो कॉंग्रेस फुडारी अजय कुमार हांणी पत्रकार परिशदेंत कमारलो. ट्रम्प हांच्या धोरणांक लागून भारताची अर्थवेवस्था नश्ट जातलो अशी शिटकावणी तांणी दिली. अजय कुमार हांणी फ्रान्सचे अध्यक्ष इमॅन्युएल माक्रॉं आनी ट्रम्प हांचे भेटीच्या, तशेंच प्रधानमंत्री नरेंद्र मोदी आनी ट्रम्प हांचे भेटीचे व्हिडियो दाखयले आनी ताची तुळा केली. कुमार हांणी ‘‘ट्रम्प हे आपले बरे इश्ट आशिल्ल्याचे मोदी म्हणटात. मात ते सदांच भारताचो अपमान करपाचो यत्न करतात.’’
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
