भांगरभूंय | प्रतिनिधी
फोंडें, प्रतिनिधी ः राज्यांत अपघातांचो आंकडो वाडत आसा. 1 जानेवारी ते 28 जून 2024 मेरेनच्या 179 दिसाच्ंया काळात राज्यांत सुमार 1,341 अपघात जाल्यात. दिसाक 8 अपघात जातात आनी सरासरी 22 वरांत एक अपघाती मरण येता. दर वर्सा जावपी अपघातांतले 25 टक्के अपघात रस्त्या वयल्या गोरवांक लागून जातात. हें वाडत वचपी अपघात आडावपा खातीर सरकारी येवजणेंतल्यान घेतिल्लीं गोरवां रस्त्यांचेर मुक्तपणान भोंवतना मेळ्ळीं जाल्यार संबंदीत शेतकाराची सरकारी येवजण बंद करतले अशी शिटकावणी मुख्यमंत्री डॉ. प्रमोद सावंत हांणी दिली.
फोंडें पालिकेन निरंकाल हांगा उबारिल्ल्या गोशाळाच्या उक्तावण वेळार मुख्यमंत्री उलयताले. हे वेळार शेतकी मंत्री रवी नायक, जलस्रोत मंत्री सुभाष शिरोडकार, पशुकल्याण मंत्री नीलकंठ हळर्णकार, आदले खासदार विनय तेंडुलकार, नगराध्यक्ष रितेश नायक, बेतोड्यां पंचायतीचे सरपंच मधु खांडेपारकार, दक्षीण गोंय जिल्लो पंचायत अध्यक्ष सुवर्ण तेंडुलकार, जिल्लो पंचायत वांगडी दीपक नायक बोरकार, उपनगराध्यक्ष दीपा कोलवेकार, पशु संवर्धन खात्याचे संचालक डॉ. नितीन नायक, मुखेल अधिकारी योगीराज गोसावी, कंत्राटदार देवेंद्र ढवळीकार, स्थळाचे धनी भवानी प्रसाद पाटील, कुर्टी पंचायतीचे सरपंच हरीश नायक तशेंच हेर पंच आनी नगरसेवक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
