भांगरभूंय | प्रतिनिधी
वास्को: दिल्लीच्या हजरत निजामुद्दीन रेल्वे स्टेशना वेल्यान वास्को रेल्वे स्टेशनाचेर पांच दिसां आदीं धाडिल्ल्या गोरवांच्या जिबां प्रकरणांत अटक केल्ल्या जबीर नूर सिदनुरच्या वांगड्यांचो वास्को रेल्वे पुलीस सोद घेतात. जबीर हो सध्या पुलीस बंदखणींत आसा. ताचो रिमांड फाल्यां सोंपतलो.
चिकनच्या नांवा खाला गोरवांच्यो जिबो आशिल्लीं दोन पार्सलां वास्को रेल्वे स्टेशनाचेर धाडिल्लीं. २९ दिसा सकाळीं सुमार णव वरांचेर गस्तीचेर आशिल्ले वास्को रेल्वे निरीक्षक अमरनाथ पासी आनी उपनिरीक्षक कृष्णा तालपी हें पार्सल ऑफिसा मुखारच्यान वतालें. तेन्ना तांकां घाणयारो वास आयलो. तांणी चवकशी केले उपरांत दोन पार्सलांतल्यान घाणयारो वास येता हें तांच्या लक्षांत आयलें. त्या पार्सलांचो दुबाव आयिल्ल्यान. ती उक्ती करपाक लायलीं. तेन्ना त्या पार्सलांतल्यान गोरवांच्यो जिबो मेळ्ळ्यो. १४० जिबो तातूंत आशिल्ल्यो. त्या सगल्यांचें मोल सुमार ५४ हजार रुपया आशिल्लें. रेल्वेंतल्या बेकायदेशीरपणान तीं धाडिल्लीं. हे विशीं जनावरांच्या दोतोरान अहवाल दिला.
ह्या प्रकरणांत अटक केल्लो जबीर हो मुळचा बेळगावचो. सध्या तो मडगांवां रावता. हीं पार्सलां एका मनशान मागयिल्लीं. तीं व्हरपा खातीर जबीर आयिल्लो. हाका लागून तो पुलिसांच्या चपक्यांत सांपडलो. तीं पार्सलां जांणी मागयिल्लीं ताचो पुलीस सोद घेतात. हे विशीं निरीक्षक पासी फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
