भांगरभूंय | प्रतिनिधी
पणजीः हवामान खात्यान शेनवारा 29 मार्चाक गोंयांत वादळी वाऱ्या सयत पावस पडपाचो अदमास उक्तायला. ते प्रमाण ह्या दिसा खातीर पावसाचो अलर्ट जारी केल्या. 30 मार्चाक कांय सुवातींनी पावस पडपाची शक्यताय आसली तरी अजून अलर्ट जारी करूंक ना. बिरेस्तारा सांजवेळा राज्यांतल्या कांय वाठारांनी ढगाळ हवामान आशिल्लें. पूण पावस पडपाची नोंद जावंक ना.
बिरेस्तारा पणजेचें तापमान चडांत चड 34 अंश आनी उण्यांत उणें तापमान 24.6 अंश नोंद जालें. मुरगांवां चडांत चड तापमान 33.6 अंश आनी उण्यांत उणें 25.2 अंश आशिल्लें. 31 मार्च ते 2 एप्रील ह्या काळांत राज्यांतलें हवामान सुकें उरतलें असो अदमास हवामान खात्यान उक्तायला. फुडल्या पांच दिसां खातीर चडांत चड तापमान 34 ते 35 अंश सेल्सियस आनी उण्यांत उणें तापमान 23 ते 24 अंश सेल्सियस मदीं आसपाची शक्यताय आसा.
हवामान खात्याच्या स्वयंचलीत केंद्राच्या नोंदी प्रमाण आयतारा साळगांवां चडांत चड तापमान 34.7 अंश, म्हापश्यां 35.4 अंश, पेडण्यां 37 अंश आनी मोपा 36.6 अंश आशिल्लें. साळगांवां उण्यांत उणें तापमान 24.4 अंश सेल्सियस, म्हापश्यां 24.6 अंश सेल्सियस, मोपा 23.5 अंश सेल्सियस आनी पोरणें गोंया 27.3 अंश सेल्सियस नोंद जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
