भांगरभूंय | प्रतिनिधी
पणजी : गोंय वैजकी महाविद्यालयांत (गोमेकॉं) विवीध २३ सुवातांचेर भरती करपाचे आसात. ह्यो सगल्यो सुवातो एका वर्साच्या कंत्राटी पद्धतीन भरतले. ह्या सुवातां खातीर सरळ मुलाखती ८ जानेवारी २०२६ दिसा गोमेकॉंतल्या डीन कार्यालयांतल्या सभाघरांत जातल्यो. इत्सूक उमेदवारांनी सकाळीं ९.३० वरांचेर गरजेच्या कागदपत्रां सयत हाजीर रावप गरजेचें. तशेंच २६ सुवातो लिव्ह व्हेकंसी तत्वाचेर भरतले.
कंत्राटी पद्धतीन भरपी २३ सुवातां मदीं रक्तपेढींत वैजकी अधिकार्याचें पद आनी अनाटॉमी विभागांत प्रशिक्षकाच्यो दरेकी चार सुवातो आसात. हे खातीर उमेदवारांकडेन गरजेची वैजकी पात्रताय आसप गरजेचें. दोनूय पदां खातीर मासीक ८० हजार रुपया वेतन आसतलें. सीव्हीटीएस आनी मेडिकल ओंकोलोजी विभागांत सहाय्यक प्राध्यापकाच्या दरेकी दोन सुवातांचेर भरती करतले. जाल्यार पथोलोजी, अनाटॉमी विभागांत ट्युटरची दरेकी एक सुवात भरतले.
तशेंच प्रसूतीशास्त्र, रेडिएशन, रेडिओलीजिस्ट, क्लिनिकल सायकॉलॉजी विभागांत व्याख्याता पदाच्या दरेके सुवाते खातीर भरती जातली. गोमेकॉचे रक्ताचे पेढींत दोळ्यांचें दान समुपदेशकांच्या २ सुवातांचेर भरती जातलें. हे खातीर उमेदवाराकडेन समाजशास्त्र विशयांतली पद्वी आसप गरजचें. तशेंच दोन वर्सां कामाचो अणभव आसप अपेक्षीत आसा. नेत्र पेढींत तंत्रज्ञांच्या दोन सुवातांचेर भरती जातली. हे खातीरउमेदवार विज्ञान विशय घेवन १२ वी पास आसप गरजेचें.
लिव्ह व्हेकन्सी पद्धतीन स्टाफ नर्सीच्या २४ जाल्यार कनीश्ट तंत्रज्ञाच्या आनी फिजिओथेरपीस्टची दरेकी एक सुवात भरतले. कनीश्ट तंत्रज्ञ पदां खातीर उमेदवार बीएससी (मायक्रोबायोलॉजी वा रसायनशास्त्र) पास आसप गरजेचें. स्टाफ नर्सी खातीर नर्सींग प्रमाणपत्र, आया प्रमाणपत्र वा बी एस सी नर्सींग पास आसप गरजेचें. नर्स पदां खातीरी ९ जानेवारीक प्रत्यक्ष मुलाखती जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
