भांगरभूंय | प्रतिनिधी
पणजी: गोंय वैजकी म्हाविद्यालयांत (गोमॅकॉ) सहाय्यक प्राध्यापक, ट्युटर, लेक्चरर आनी वैजकी अधिकाऱ्यांच्या 17 सुवातांचेर भरती करतले.
गोंय विद्यापिठांत असोसिएट आनी असिस्टंट प्राध्यापकांच्या 6 सुवातांचेर जाल्यार गोंय घर निर्माण मंडळांत 4 सुवातांचेर भरती करतले. हे विशीं अदीक म्हायती संबंदीत खात्यांच्या संकेतथळार उपलब्ध करून दिल्यात.
गोमॅकाँतली भरती एका वर्साच्या कंत्राटी तत्वाचेर करतले. सगल्यांत चड स सुवातो पॅथोलिजी विभागांत लेक्चरर पदाच्यो आसात. सगल्या सुवातां खातीर पिरायेची मर्यादा 45 आसा. हे खातीर 8 सप्टेंबर दिसा दनपारां 3.30 वरांचेर थेट मुलाखत घेतले.
पेडीएट्रीक विभागांत लेक्चरर पदाच्यो तीन सुवातो भरतले. जनरल सर्जरी विभागांत लेक्चरर पदाच्यो दोन सुवातो भरतले. कार्डियो व्हीटीएस विभागांत सहाय्यक प्राध्यापकाची एक सुवात भरतले.
गोंय विद्यापिठांत वातावरणीय विज्ञान विभागांत असोसिएट प्राध्यपकाच्यो दोन जाल्यार असिस्टंट प्राध्यापकांच्या चार सुवातांचेर भरती करतले. वट्ट स पैकीं तीन सुवतो आरक्षीत आसात. ही भरती नियमीत तत्वाचेर करतले. हे खातीर अर्ज करपाची निमाणी मुजत तीन ऑक्टोबर मेरेन आसा. सगल्या पदां खातीर 15 वर्सांचो राबितो दाखलो आसप गरजेचें आसा. तशेंच उमेदवाराक कोंकणी भाशेचें ज्ञान आसूंक जाय. हाचे पयलीं अर्ज केल्ल्यांक परतून अर्ज करपाची गरज ना.
गोंय घर निर्माण मंडळांत चार सुवातांचेर भरती करतले. हातूंत दोन सुवातो कनिश्ठ अभियंत्यांच्यो (सिव्हील) आसात. ह्यो दोनूय सुवातो ओबीसी समाजा खातीर राखीव आसात. सहाय्यक आर्किटेक्टाचे एके सुवातेर भरती करतले. हें पद अनारक्षीत आसात. तशेंच एमटीएस पदाच्या एका सुवातेर भरती करतले. ही सुवात ईडब्ल्यूएस खातीर राखीव आसतली. सगल्यां पदां खातीर अर्ज करपाची निमाणी तारीख 22 सप्टेंबर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
