गोमॅकाँत काळजाचो आताक दुयेंसाचे दिसाक सरासरी चार दुयेंती: विश्वजीत

भांगरभूंय | प्रतिनिधी

एका वर्सांत 14 टक्क्यांनी वाड

पणजी: गोंय वैजकी म्हाविद्यालयांत (गोमॅकॉ) फाटल्या दोन वर्सांत काळजाचो आताक आयिल्ले 2904 दुयेंती दाखल जाल्यात. हाचोच अर्थ दिसाक सरासरी चार दुयेंती दाखल जाल्यात. गोमॅकाँत 2023 चे तुळेन 2024 वर्सा काळजाचो आताक आयिल्ल्या दुयेंतींची संख्या 14.31 टक्क्यांनी वाड जाल्या. भलायकी मंत्री विश्वजीत राणे हांणी विधानसभेंत दिल्ले लेखी जापेंतल्यान ही म्हायती मेळ्ळी. हे विशीं आमदार आलेक्स रेजिनाल्ड हांणी अतारांकीत प्रस्न विचारिल्लो.

जापेंत दिल्ले म्हायती प्रमाण 2023 वर्सा गोमॅकाँत काळजाचो आताक आयिल्ल्या 1355 दुयेंतींचेर उपचार केल्ले. हातूंत 949 दादले जाल्यार 406 बायलो आशिल्ल्यो. 2024 वर्सा ही संख्या वाडून 1549 जाली. हातूंत 1153 दादले आनी 396 बायलो आशिल्ल्यो. 2023 वर्सा काळजाचो आताक आयिल्ल्या वट्ट दुयेंती मदीं 173 (12.76 टक्के) हे 21 ते 40 वर्सां पिराये गटांतले आशिल्ले. 41 ते 60 वर्सा पिराये गटांतले 579 (42.73 टक्के) जाल्यार 61 ते 80 वर्सा पिराये गटांतले 578 (42.58 टक्के) दुयेंती आशिल्ले. उरिल्ले दुयेंती हे 81 वर्सां पिराये वयले आशिल्ले.

गोमॅकाँत 2024 वर्सा काळजाचो आताक आयिल्ल्या वट्ट दुयेंती मदीं तीन दुयेंती हे 20 वर्सा पिराये सकयल्ले आशिल्ले. हातूंत दोन दादले जाल्यार एका बायलेचो आस्पाव आशिल्लो. तशेंच 127 (8.19 टक्के) हे 21 ते 40 वर्सा पिराये गटातले आशिल्ले. 41 ते 60 वर्सा पिराये गटांतले 706 (45.57 टक्के) जाल्यार 61 ते 80 वर्सा पिराये गटांतले 642 (41.44 टक्के) दुयेंती आशिल्ले. जाल्यार 65 दुयेंती (4.19 टक्के) दुयेंती हे 81 वर्सां पिराये वयले आशिल्ले.

2024 वर्सा म्हयन्या प्रमाण पळयत जाल्यार जानेवारींत सगल्यांत चड 149 दुयेंती काळजाचो आताकाच्या उपचारा खातीर गोमॅकाँत दाखल जाल्ल्याचें जापेंत म्हणलां.

सगल्यांत चड दुयेंती बार्देस म्हालांतले

जापेंत दिल्ले म्हायती प्रमाण 2023 आनी 2024 वर्सा गोमॅकाँत काळजाचो आताक ह्या उपचारा खातीर दाखल जाल्ले सगल्यांत चड दुयेंती 611 हे बार्देस म्हालांतले आशिल्ले. जाल्यार तिसवाडीतले 531, साश्टीतले 441, फोंडेंचे 403, मुगगांवचे 392, सत्तरीतले 145, दिवचलचे 138 जाल्यार केपें म्हालांतले 119 दुयेंती आशिल्ले.