भांगरभूंय | प्रतिनिधी
8 मेक थेट मुलाखत; म्हयन्याक 60 हजार पगार
भांगरभूंय । प्रतिनिधी
पणजी : गोंय वैजकी म्हाविद्यालय (गोमॅकॉ) कनिश्ठ निवासी दोतोरांच्या 38 पदांची भरती करतले. ते खातीर 8 मेक गोमॅकाँत थेट मुलाखत जातली. उमेदवारान गोंय विद्यापीठ वा एनएमसी वरवीं मान्यता प्राप्त विद्यापिठाची पदवी घेतिल्ली आसपाक जाय. निवड जाल्ल्या उमेदवारांक म्हयन्याक 60 हजार रुपया पगार दितले. सगल्या पदांची मुजत एका वर्साची आसतली.
ह्या 38 पदां मदीं न्युरोलोजी आनी इंडोक्रीनोलॉजीच्यो दरेकी 6, नेफ्रोलॉजी आनी कार्डियोलॉजीच्यो दरेकी 5, युरोलॉजीच्यो 4, सीव्हीटीएस आनी पेडीएट्रीक सर्जरी विभागांत दरेकी 3, मॅडिकल अंकोलॉजीच्यो 2 जाल्यार प्लास्टीक सर्जरी आनी रेडियोलॉजी विभागांत दरेकी एक सुवात भरतले. उमेदवारांनी मुलाखतीक येतना एमबीबीएस प्रमाणपत्र, परिक्षेंतल्या गुणांचें विवरण, इनटर्नशीप प्रमाणपत्र हांच्यो फोटो कॉपी हाडप गरजेचें आसा. ते भायर उमेदवारांक गोंय राज्य वैजकी मंडळा कडेन कायमस्वरुपी नोंदणी प्रमाणपत्र, जल्मदाखलो, आधार कार्ड हीं कागदपत्रां सादर करचीं पडटलीं. उमेदवाराची पिराय 45 परस उणी आसपाक जाय. मुलाखती खातीर 8 मेक सकाळीं 10.30 वरांचेर हाजीर रावप गरजेचें आसा. उमेदवारांक कसलोच टीए, डीए दिवचे नात. निवड जाल्ल्या उमेदवारांक पांच ते स दिसां भितर कामाचेर रुजू जावप गरजेचें आसा. अदीक म्हायती खातीर गोमॅकॉच्या संकेतथळाक भेट दिवची, अशें प्रशासनान कळयलां.
वरिश्ठ निवासी दोतोरांच्या दोन सुवातांचेर भरती
गोमॅकाँत कार्डियोलॉजी विभागांत वरिश्ठ निवासी दोतोरांच्या दोन सुवातांचेर भरती करतले. ह्या पदांचो कालावधी 3 वर्सांचो आसतलो. हे खातीर तीन वर्सांचो अणभव आसप गरजेचो आसा. उमेदवारांनी 8 मेक सकाळीं 10.30 वरांचेर परिशद सभाघरांत उपस्थीत रावचें, अशें गोमॅकॉ प्रशासनान कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
