भांगरभूंय | प्रतिनिधी
भांगरभूंय । प्रतिनिधी
मडगांवः मडगांवच्या गोमन्त कला असोसिएशनान गोंय घटकराज्य दिसा निमतान कला आनी संस्कृती खातें आनी मडगांवच्या रवींद्र भवनाच्या जोड पालवान 28 तें 30 मे अशे दोन दीस दनपारां 2.30 तें सांजे 6.30 मजगतीं मडगांव रवींद्र भवनान अभिनव गोमंत संगीत महोत्सवाचें आयोजन केलां.
महोत्सव 12 तें 25 वर्सां पिरायेच्या गटांतल्या कलाकारां खातीर आसा. तातूंत शाळा, उच्च माध्यमीक, म्हाविद्यालय आनी संगीत विद्यालयांतल्या चले- चलयांक वांटो घेवपाक मेळटलो. पांच कलाकारांचो एक पंगड अशे तरेन वांटो घेवपाक जाय. तातूंत एक गायक, एक गायिका, एक हार्मोनिअम, एक तबलापटू आनी एक सूत्रनिवेदक हांचो आसपाव आसपाक जाय. गायक- गायिकेचें दरेकी एक पद, एक युगल गीत तशेंच हार्मोऩिअम आनी तबल्याची जुगलबंदी सादर करची पडटली. ताचे खातीर मांडणी आनी सादरीकरणा खातीर चडांत चड 30 मिनटां मेळटलीं. दरेका पंगडाक हार्मोनिअम. तबलें आनी टाळ अश्या तीन वाद्यांचो वापर करपाक मेळटलो. सादर करतात ती पदां फकत शास्त्रीय संगीताचेर आदारीत आसपाक जाय. नाट्यगीत, भावगीत, सिनेगीत, भक्तिगीतांचे सादरीकरण करपाक मेळटलें. ही पदां कोंकणीी, मराठी वा हिंदी भाशेंत आसपाक जाय.
दरेक शाळा, उच्च माध्यमीक, म्हाविद्यालय आनी संगीत शाळांक आपले चडांत चड दोन पंगड धाडपाक मेळटले. सादरीकरणाच्या आदारान पंगडांक मानधन, प्रवास खर्च दितले. महोत्सवा वेळार खासा आमंत्रीत तज्ज्ञां कडल्यान मार्गदर्शनाचो लाब घेवपाक मेळटलो. चडावत म्हायती खातीर मंगेश बोरकार (9422441204) हाचे कडेन संपर्क सादचो. प्रवेशिका कलाकारांच्या नांवा वांगडा मंगेश बोरकार, गोमन्त कला असोसिएशन, आबाद फारिया रोड, मुरमुटी, मडगांव गोंय ह्या नाम्यार वा [email protected] हे बेवसायटीचेर 20 मे मेरेन धाडच्यो अशें आयोजकांनी कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
