भांगरभूंय | प्रतिनिधी
मडगांवः गोमंत विद्या निकेतनाची 24 वी फोमेंतो पुरस्कृत पांच दिसांची ‘विचारवेध’ व्याख्यानमाला 24 ते 28 जानेवारी ह्या काळांत जातली.
हे व्याख्यानमालेंत 24 जानेवारीक राष्ट्रीय इनाम जिखिल्ले चित्रपट- नाट्य अभिनेते आनी सौमित्र नांवान कविता बरोवपी किशोर कदम हांचे कडेन प्रा. आनंद मासूर संवाद सादतले. विशय आसा, ‘किशोरः एक अभिव्यक्ती’.
25 जानेवारीक मुंबयच्यो डॉ. मीना वैशंपायन ह्यो ‘एशियाटीक सोसायटीः व्यासंग आनी विद्वत्ता हांचो संगम’ ह्या विशयाचेर दुसरें पुश्प गुंथतल्यो. मुंबयच्या संवसारीक नामनेच्या एशियाटीक सोसायटीच्यो त्यो मानद उपाध्यक्ष म्हूण वावर करतात. पुणे विद्यापिठांतल्यान मराठी आनी संस्कृत विशयांत एम. ए. आनी मुंबय विद्यापिठाच्या विद्यावाचस्पती अर्थात पीएचडीच्यो त्यो मानकरी आसात.
26 जानेवारीक सर्वोच्च न्यायालयाचे ज्येश्ठ वकील अॅड. संजय हेगडे हे ‘भारतीय संविधान आनी लोकप्रतिनिधी घरांतली वेंचणूक, जैतिवंत आनी नियुक्त वांगड्यांच्या अभिव्यक्ती वयली मर्यादा ह्या विशयाचेर उलयतले. दिल्लीच्या ‘निर्भया’ आनी ‘शाहीन बाग’ ह्या खट्यांनी सर्वोच्च न्यायालयान नेमणूक केल्ले अमिकस क्युरी म्हूण तांणी योगदान दिलां.
27 जानेवारीक डॉ. ऑस्कर रिबेलो हे ‘गोंयः मानसीक असंतुळायेचें अस्वास्थ’ ह्या विशयाचेर विचार मांडटले. लोकशाय मुल्यांचें घट्टण, वाडटे असहिश्णुतेचो शेक, जैवविविधताय आनी सैमाचो विध्वंस आनी नैतीक मुल्यांची पडझड’ हे तांचे आस्थेचे विशय आसात. इंटेल, अपल ह्या संवसारीक कंपनींतल्यान फर्स्ट मल्टीटच स्क्रीन, आयपॅड, मॅकबूक, आयमॅक आनी आयपोड हांचे निर्मितींत ते सगळ्यांत मुखार आसात. सध्या चीन देशांत ते रावतात. गोमंत विद्या निकेतनाच्या पयल्या माळ्या वयल्या गोविंद रामनाथ उर्फ बाबा कारे सभाघरांत सद्दां सांजेच्या 6 वरांचेर हीं व्याख्यानां जातलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
